ചെന്നലോടിൽ പള്ളിക്ക് സമീപം ഷെഡ്ഡില്‍ നിര്‍ത്തിയിട്ട കാര്‍ കത്തിനശിച്ചു
പടിഞ്ഞാറത്തറ : ചെന്നലോട് വൈപ്പടിയില്‍ മദീനാപള്ളിക്ക് സമീപം ഷെഡ്ഡില്‍ നിര്‍ത്തിയിട്ട കാര്‍ കത്തി നശിച്ചു. മാരുതി റിറ്റ്‌സ് കാറാണ് ഇന്നലെ രാത്രി ഒരു മണിയോടെ കത്തിനശിച്ചത്. പടിഞ്ഞാറത്തറ ചെന്നലോട് മുക്രിവീട്ടില്‍ സിറാജിന്റെ ഉടമസ്ഥതയിലുള്ള കാറാണ് പൂര്‍ണ്ണമായും കത്തിനശിച്ചത്.
വീട്ടില്‍ കാര്‍ വെക്കാന്‍ സൗകര്യ കുറവ് മൂലം പള്ളിയോട് ചേര്‍ന്ന ഷെഡ്ഡിലാണ് സിറാജ് കാര്‍ സൂക്ഷിക്കാറുള്ളത്. കാര്‍ കത്തിയതിനോടൊപ്പം പരിസരത്ത് സൂക്ഷിച്ചിരുന്ന രണ്ട് ഗ്യാസ് സിലിണ്ടറുകളും കത്തിയിട്ടുണ്ട്. സംഭവത്തില്‍ പള്ളിയുടെ ഭിത്തിക്കും കേടുപാടുകള്‍ സംഭവിച്ചിട്ടുണ്ട്. കൂടാതെ ഇവിടെ സൂക്ഷിച്ചിരുന്ന നിരവധി ഫൈബര്‍ കസേരകളും കത്തി നശിച്ചു. സംഭവത്തെ തുടര്‍ന്ന് നാട്ടുകാരും തുടര്‍ന്ന് സ്ഥലത്തെത്തിയ അഗ്‌നി സുരക്ഷാസേനാംഗങ്ങളും ചേര്‍ന്നാണ് തീയണച്ചത്. തീപിടുത്തത്തിന്റെ കാരണം വ്യക്തമായിട്ടില്ല.
