ബിരുദ വിദ്യാര്ഥിനികള്ക്ക് പ്രതിവര്ഷം 25,000 രൂപ സ്കോളര്ഷിപ്പ് ; അപേക്ഷ ക്ഷണിച്ചു
ഉന്നതവിദ്യാഭ്യാസ രംഗത്ത് പെണ്കുട്ടികള്ക്ക് സാമ്പത്തിക സഹായം നല്കുന്നതിനായി അഖിലേന്ത്യാ സാങ്കേതിക വിദ്യാഭ്യാസ കൗണ്സില് (AICTE) നടപ്പാക്കുന്ന സരസ്വതി സ്കോളർഷിപ്പിലേക്ക് ഇപ്പോള് അപേക്ഷിക്കാം. 2026-27 അധ്യയന വർഷത്തേക്കുള്ള പുതിയ അപേക്ഷകളും പുതുക്കല് അപേക്ഷകളും ഇപ്പോള് ഔദ്യോഗിക പോർട്ടല് വഴി സമർപ്പിക്കാം. ബി.ബി.എ (BBA), ബി.സി.എ (BCA), ബി.എം.എസ് (BMS) കോഴ്സുകള് പഠിക്കുന്ന വിദ്യാർഥിനികള്ക്ക് ഈ പദ്ധതിയിലൂടെ സാമ്പത്തിക സഹായം ലഭിക്കും.
സ്കോളർഷിപ്പ് തുക
തിരഞ്ഞെടുക്കപ്പെടുന്ന വിദ്യാർഥിനികള്ക്ക് പ്രതിവർഷം 25,000 രൂപ വീതം ലഭിക്കും. മൂന്ന് വർഷത്തെ ബിരുദ പഠനത്തിന് പരമാവധി 75,000 രൂപ വരെ സ്കോളർഷിപ്പായി ലഭിക്കും. കോളജ് ഫീസ്, പുസ്തകങ്ങള്, സ്റ്റേഷനറി,കംപ്യുട്ടർ, പഠനോപകരണങ്ങള്, സോഫ്റ്റ്വെയർ എന്നിവയ്ക്കായി തുക വിനിയോഗിക്കാം.യോഗ്യത
ഇന്ത്യൻ വിദ്യാർഥിനിയായിരിക്കണം.
2026-27 അധ്യയന വർഷം എ.ഐ.സി.ടി.ഇ അംഗീകാരമുള്ള സ്ഥാപനത്തില് ബി.ബി.എ, ബി.സി.എ, ബി.എം.എസ് കോഴ്സിന്റെ ഒന്നാം വർഷം പഠിക്കുന്നവരായിരിക്കണം.
കുടുംബത്തിന്റെ വാർഷിക വരുമാനം എട്ട് ലക്ഷം രൂപയില് താഴെയായിരിക്കണം.
പ്ലസ് ടു അല്ലെങ്കില് തത്തുല്യ യോഗ്യത നേടിയ ശേഷം ബിരുദ പ്രവേശനത്തിനിടയില് രണ്ട് വർഷത്തില് കൂടുതല് പഠന ഇടവേള ഉണ്ടായിരിക്കരുത്.
പ്രധാന തീയതികള്
അപേക്ഷാ പോർട്ടല് തുറന്നത്: 2026 ഒക്ടോബർ 15
കോളജ് തല പരിശോധനയുടെ അവസാന തീയതി: 2027 ജനുവരി 31സംസ്ഥാനതല പരിശോധനയുടെ അവസാന തീയതി: 2027 ഫെബ്രുവരി 15
അപേക്ഷയിലെ അപാകതകള് പരിഹരിക്കാനുള്ള അവസാന തീയതി: 2027 ഫെബ്രുവരി 28
എങ്ങനെ അപേക്ഷിക്കാം?
യോഗ്യതയുള്ള വിദ്യാർഥിനികള് ഔദ്യോഗിക വെബ്സൈറ്റായ https://sarswati.aicte.gov.in/ സന്ദർശിച്ച് ഓണ്ലൈനായി അപേക്ഷിക്കണം. അപേക്ഷ സമർപ്പിച്ച ശേഷം കോളജ് അധികൃതരുമായി ബന്ധപ്പെട്ട് പരിശോധന പൂർത്തിയായെന്ന് ഉറപ്പാക്കണം. അപേക്ഷയിലെ വിവരങ്ങളും രേഖകളും കൃത്യമാണെന്ന് പരിശോധിച്ച ശേഷമേ സമർപ്പിക്കാവൂ.
