വിദ്യാർഥികൾക്ക് സെൻട്രൽ സെക്ടർ സ്കോളർഷിപ്പിന് അപേക്ഷിക്കാം
കോളജ് / സർവകലാശാലാ വിദ്യാർഥികൾക്കായി കേന്ദ്ര വിദ്യാഭ്യാസമന്ത്രാലയം ഏർപ്പെടുത്തിയിട്ടുള്ള 2025–26 ലെ സെൻട്രൽ സെക്ടർ സ്കോളർഷിപ്പിന് ഒക്ടോബർ 31 വരെ ഓൺലൈൻ അപേക്ഷ സ്വീകരിക്കും. ഇപ്പോൾ കിട്ടിവരുന്ന സ്കോളർഷിപ് പുതുക്കുന്നതിനും ഇതേതീയതി വരെ അപേക്ഷിക്കാം. കേരളത്തിൽ ഇതു നടപ്പാക്കുന്നത് കൊളീജിയറ്റ് എജ്യുക്കേഷൻ ഡയറക്ടറാണ്.
യോഗ്യത: – ഹയർസെക്കൻഡറി, വിഎച്ച്‌എസ്‌ഇ ബോ‍ർഡുകൾ നടത്തിയ 2025 ലെ 12–ാം ക്ലാസ് പരീക്ഷകളിൽ 80–ാം പെർസെന്റൈലിൽ കൂടുതൽ വരുന്നതിനു വേണ്ട മാർക്ക് നേടി, റഗുലർ ബിരുദ ഒന്നാംവർഷ ക്ലാസിൽ ചേർന്നവരിൽനിന്നു തിരഞ്ഞെടുക്കപ്പെടുന്നവർക്കാണ് അർഹത. (യോഗ്യതാപരീക്ഷ ജയിച്ചവരിൽ ആദ്യത്തെ 20% പേരിൽ പെടണം). അപേക്ഷകരുടെ പ്രായം 18–25 വയസ്സ്. കുടുംബ വാർഷിക വരുമാനം നാലര ലക്ഷം രൂപ കവിയരുത്. കറസ്പോണ്ടൻസ്/ഡിസ്റ്റൻസ്/ഡിപ്ലോമ കോഴ്സുകാരും മറ്റേതെങ്കിലും സ്കോളർഷിപ് കിട്ടുന്നവരും അപേക്ഷിക്കേണ്ട. സിബിഎസ്ഇ, ഐഎസ്‌സി യോഗ്യത നേടിയവർക്കും ഈ അർഹതയുണ്ട്.പോർട്ടലിൽ നിന്നും കോളജുകളിൽനിന്നും വിവരങ്ങൾ ലഭിക്കും.
അപേക്ഷ :- https://scholarships.gov.in എന്ന പോർട്ടലിൽ റജിസ്റ്റർ ചെയ്താണ് ഓൺലൈൻ അപേക്ഷ സമർപ്പിക്കേണ്ടത്. അപേക്ഷയുടെ പ്രിന്റ്, വരുമാനം / യോഗ്യത / ജാതി എന്നിവ തെളിയിക്കുന്ന സർട്ടിഫിക്കറ്റുകൾ, പ്രിൻസിപ്പൽ നൽകിയ പ്രവേശന റിപ്പോർട്ട് എന്നിവ കോളജിൽ നൽകണം.
സ്കോളർഷിപ്:-
കേരളത്തിനുവകയിരുത്തിയിട്ടുള്ള സീറ്റുകളിൽ പകുതിപെൺകുട്ടികൾക്കാണ്.പട്ടികജാതി, പട്ടികവർഗ, പിന്നാക്കവിഭാഗക്കാർക്കു യഥാക്രമം15 / 7.5 / 27 % സംവരണമുണ്ട്. ഭിന്നശേഷിക്കാർക്ക് 5ശതമാനവും. ബിരുദതലം മുതൽ പ്രഫഷനൽ കോഴ്സുകളുൾപ്പെടെ 5 വർഷംവരെ സഹായം കിട്ടും. ഹ്യുമാനിറ്റീസ്, സയൻസ്, കൊമേഴ്സ്, വിഷയങ്ങൾക്ക് 3:3:1 അനുപാതത്തിൽ സ്കോളർഷിപ്പുകൾ വീതിക്കും. ബിരുദതലത്തിൽ 12,000 രൂപ, ബിരുദാനന്തര തലത്തിൽ 20,000 രൂപ എന്ന ക്രമത്തിലാണ് വാർഷിക സ്കോളർഷിപ്. വിദ്യാർഥിയുടെ പേരിൽ േശസാൽകൃത / ഷെ‍ഡ്യൂൾഡ് ബാങ്കിൽ ആധാർ ലിങ്ക് ചെയ്ത സേവിങ്സ് ബാങ്ക് അക്കൗണ്ട് വേണം. കേന്ദ്രത്തിൽനിന്ന് അക്കൗണ്ടിലേക്കു േനരിട്ടു തുക കൈമാറും. സമർപ്പിച്ച അപേക്ഷാഫോമിന്റെയും അനുബന്ധരേഖകളുടെയും പകർപ്പ് വിദ്യാർഥി 5 ദിവസത്തിനകം കോളജിൽ ഏൽപിക്കണം.
പുതുക്കൽ :-
വർഷംതോറും സ്കോളർഷിപ് പുതുക്കണം. 75% ഹാജരും വാർഷിക പരീക്ഷയിൽ 50% മാർക്കും ഉണ്ടെങ്കിലേ പുതുക്കൽ അനുവദിക്കൂ. പുതുക്കുന്നതിന് വരുമാന സർട്ടിഫിക്കറ്റ് വേണ്ട. ഒരു വർഷം പുതുക്കാൻ വിട്ടുപോയവരെ അതിനടുത്ത വർഷം പുതുക്കാൻ അനുവദിക്കും.
വിവരങ്ങൾക്ക്
https://scholarships.gov.in, www.dcescholarship.kerala.gov.in എന്ന വെബ്സൈറ്റിലെ Notifications കലിങ്ക്. കേരളത്തിലെ അന്വേഷണങ്ങൾക്ക് 94470 96580.
