സ്വർണവിലയിൽ ഇന്നും വർധന : 200 രൂപ കൂടി
വിവാഹ സീസണ് അടുത്തെത്തുമ്പോള് സാധാരണക്കാർക്കും സ്വർണാഭരണ പ്രേമികള്ക്കും കനത്ത ആഘാതമായി സ്വർണവില കുതിച്ചുയരുന്നു.
സ്വർണ വില ഇന്നും കൂടി. വിപണിയില് ഗ്രാമിന് 25 രൂപയും പവന് 200 രൂപയുമാണ് ഇന്ന് ഉയർന്നത്. ഇതോടെ ഒരു ഗ്രാം സ്വർണത്തിന്റെ വില 13,255 രൂപയായും, ഒരു പവൻ സ്വർണത്തിന്റെ വില 1,06,040 രൂപയായും ഉയർന്നു.
വിവാഹ ആവശ്യങ്ങള്ക്കും മറ്റ് ആഘോഷങ്ങള്ക്കുമായി തയാറെടുക്കുന്ന കുടുംബങ്ങള്ക്ക് ഈ വിലക്കയറ്റം വലിയ സാമ്പത്തിക ബാധ്യതയാണ് ഉണ്ടാക്കിക്കൊണ്ടിരിക്കുന്നത്. ചെറിയ ആഭരണങ്ങള് വാങ്ങാൻ പോലും സാധാരണക്കാർക്ക് വൻ തുക കണ്ടെത്തേണ്ടി വരുന്ന ഗൗരവകരമായ സാഹചര്യമാണ് നിലവിലുള്ളത്.തുടർച്ചയായ ദിവസങ്ങളില് സ്വർണവില വർധിക്കുന്നത് സാധാരണക്കാരായ ഉപഭോക്താക്കള്ക്ക് വലിയ ആശങ്കയാണ് ഉണ്ടാക്കുന്നത്. ഇന്നലെ ഗ്രാമിന് 75 രൂപയും പവന് 600 രൂപയും വർധിച്ച് 1,05,840 രൂപയായിരുന്നു പവൻ വില. ഈ നിരക്കാണ് ഇന്ന് വീണ്ടും കൂടിയത്. അതേസമയം, ആഭ്യന്തര വിപണിയില് വില ഉയരുമ്പോള് അന്താരാഷ്ട്ര വിപണിയില് സ്വർണവിലയില് ഇടിവാണ് രേഖപ്പെടുത്തിയിരിക്കുന്നത്.
അന്താരാഷ്ട്ര വിപണിയില് സ്പോട്ട് ഗോള്ഡ് ട്രോയ് ഔണ്സിന് 22.47 ഡോളർ കുറഞ്ഞ് 4,078.64 ഡോളറിലെത്തി. ഇത് ഏകദേശം 0.55 ശതമാനത്തിന്റെ കുറവാണ് കാണിക്കുന്നത്. പ്രാദേശിക വിപണിയിലെ വിലക്കയറ്റവും ആഗോള വിപണിയിലെ മാറ്റങ്ങളും ഒരുപോലെ നിരീക്ഷിച്ചാണ് വ്യാപാരികളും ഉപഭോക്താക്കളും മുന്നോട്ട് പോകുന്നത്.
