കമ്മോത്ത് ഇടിമിന്നലിൽ വീട് ഭാഗികമായി കത്തിനശിച്ചു ; ഒഴിവായത് വൻ അപകടം

എടവക : ഇടിമിന്നലിൽ വീട് ഭാഗികമായി കത്തിനശിച്ചു. എടവക പഞ്ചായത്തിലെ കമ്മോത്ത് ബീരാളി ഇബ്രാഹിമിൻ്റെ വീട്ടിലെ ഒരു മുറിയാണ് പൂർണ്ണമായും കത്തിനശിച്ചത്. ഇന്നലെ രാത്രി 10.30 ഓടെ യാണ് സംഭവം. പാസ്പോർട്ട്, ആധാരം തുടങ്ങിയ പ്രധാന രേഖകൾ തീപിടുത്തത്തിൽ കത്തിനശിച്ചു.

ഇടിമിന്നലേറ്റ ഈ മുറിയിൽ കഴിഞ്ഞിരുന്ന ഇബ്രാഹിം അസുഖബാധിതനായി ആശുപത്രി യിൽ ചികിത്സയിലായിരുന്നതിനാൽ വൻ അപകടം ഒഴിവായി. വീട്ടിലുണ്ടായിരുന്ന മറ്റു കുടുംബാംഗങ്ങൾ മറ്റ് മുറികളിലായിരുന്നു ഉണ്ടായിരുന്നത്. പുലർച്ചെ നാല് മണിയോടെ വീട്ടിനുള്ളിൽ നിന്നും പുക ഉയരുന്നത് കണ്ട് നോക്കിയപ്പോഴാണ് വീട്ടുകാർ സംഭവം അറിയുന്നത്. അപ്പോഴേക്കും മുറിയിൽ സൂക്ഷിച്ചിരുന്ന പാസ്പോർട്ടും ആധാരവുമടങ്ങുന്ന സുപ്രധാന രേഖകൾ കത്തി നശിച്ചിരുന്നു. കട്ടിലും, കിടക്കയും വസ്ത്രങ്ങളും പൂർണമായും കത്തിനശിച്ചതായി വീട്ടിലുണ്ടായിരുന്ന മകൾ സഫിയ പറഞ്ഞു. ഇടിമിന്നലിൽ തീപിടിച്ചതോ, മിന്നലിനെ തുടർന്ന് ഉണ്ടായ ഷോർട്ട് സർക്യൂട്ടോ ആകാം തീപിടുത്തത്തിന് കാരണമെന്നാണ് വീട്ടുകാർ സംശയിക്കുന്നത്.