News Today Wayanad

News Updates..

വാഹനം ഓവർടേക്ക് ചെയ്തതിന് യുവാവിനെ കൂട്ടം ചേർന്ന് മര്‍ദ്ദിച്ച് പരിക്കേല്‍പ്പിച്ചു : യുവാക്കൾ അറസ്റ്റിൽ

1 min read

 

മേപ്പാടി : കാര്‍ ബൈക്കിനോട് ചേര്‍ന്ന് ഓവര്‍ടേക്ക് ചെയ്തതുമായി ബന്ധപ്പെട്ടുള്ള തര്‍ക്കത്തെ തുടര്‍ന്ന് യുവാവിനെ ക്രൂരമായി മര്‍ദ്ദിച്ചു പരിക്കേല്‍പ്പിച്ച സംഭവത്തില്‍ രണ്ട് പേരെ മേപ്പാടി പോലീസ് അറസ്റ്റ് ചെയ്തു. മലപ്പുറം സ്വദേശികളായ കടമ്പോട് ചാത്തന്‍ചിറ വീറ്റില്‍ ബാദുഷ(26), തിരൂര്‍ പൂക്കയില്‍ പുഴക്കല്‍ വീട്ടില്‍ മുഹമ്മദ് റാഷിദ് (29) എന്നിവരെയാണ് മേപ്പാടി പോലീസ് മുട്ടിലില്‍ വെച്ച് അറസ്റ്റ് ചെയ്തത്. സംഭവത്തില്‍ ഉള്‍പ്പെട്ട മറ്റു പ്രതികള്‍ക്കായി അന്വേഷണം ഊര്‍ജിതമാക്കി.

 

മെയ് 5 ന് പുലര്‍ച്ചെയാണ് കേസിനാസ്പദമായ സംഭവം നടന്നത്. തോമാട്ടുച്ചാല്‍ സ്വദേശിയായ യുവാവ് ഓടിച്ചിരുന്ന കാര്‍ ബൈക്കിനോട് ചേര്‍ന്ന് ഓവര്‍ടേക്ക് ചെയ്തതായി ആരോപിച്ച് എട്ടോളം ആളുകള്‍ ചേര്‍ന്ന് യുവാവിനെ കാറില്‍ നിന്നും വലിച്ചിറക്കി അതിക്രൂരമായി ആയുധങ്ങള്‍ ഉപയോഗിച്ച് ക്രൂരമായി മര്‍ദിച്ചു. തുടര്‍ന്ന്, വാഹനത്തില്‍ കയറ്റി ചിത്രമൂലയിലെ ചായത്തോട്ടത്തില്‍ കൊണ്ടുപോയി വീണ്ടും മര്‍ദിക്കുകയും കത്തി കാണിച്ച് കൊല്ലുമെന്ന് ഭീഷണിപ്പെടുത്തുകയും ചെയ്തു. മര്‍ദനത്തെ തുടര്‍ന്ന് യുവാവിന്റെ കാല്‍പാദത്തിന്റെ എല്ലു പൊട്ടി ഗുരുതര പരിക്കേല്‍ക്കുകയായിരുന്നു.

 

എസ്.ഐ എം.പി ഷാജി, സീനിയര്‍ സിവില്‍ പോലീസ് ഓഫീസര്‍മാരായ എം.വി ബിഗേഷ്, എ.എസ് പ്രശാന്ത് കുമാര്‍, സിവില്‍ പോലീസ് ഓഫീസറായ ബാലു നായര്‍ തുടങ്ങിയ സംഘമാണ് ഇവരെ പിടികൂടിയത്.

 

ദേഹപരിശോധനക്കിടെ പ്രതികളിൽ ഒരാളായ മുഹമ്മദ് റാഷിദിൻ്റെ പക്കൽ നിന്നും വില്‍പ്പനക്കായി സൂക്ഷിച്ച അതിമാരക മയക്കുമരുന്നായ 19.79 ഗ്രാം എം.ഡി.എം.എയും കണ്ടെടുത്തു.

About The Author

Leave a Reply

Your email address will not be published. Required fields are marked *

Copyright © All rights reserved NEWS TODAY WAYANAD. | LogicWebs by Designed.