സ്വകാര്യ ആശുപത്രികളിലെ കൊള്ളയടിക്ക് പൂട്ടിടാൻ സര്‍ക്കാര്‍ ; ചികിത്സാച്ചെലവ് നിയന്ത്രിക്കാൻ പുതിയ നിയമം
സംസ്ഥാനത്തെ സ്വകാര്യ ആശുപത്രികളിലെ അമിത ചികിത്സാച്ചെലവിന് കർശന നിയന്ത്രണമേർപ്പെടുത്താൻ ലക്ഷ്യമിട്ട് സർക്കാർ പുതിയ നിയമനിർമാണത്തിന് ഒരുങ്ങുന്നു. രോഗികളില്‍ നിന്ന് അമിത നിരക്ക് ഈടാക്കുന്നതും ചികിത്സാച്ചെലവിലെ സുതാര്യതയില്ലായ്മയും തടയുന്നതിനായി പുതിയ നിയമം കൊണ്ടുവരുന്നതിനുള്ള നടപടികള്‍ ആരംഭിച്ചതായി ആരോഗ്യ-ദേവസ്വം വകുപ്പ് മന്ത്രി കെ മുരളീധരൻ വാർത്താക്കുറിപ്പിലൂടെ അറിയിച്ചു.
കരട് തയ്യാറാക്കാൻ നാലംഗ സമിതി
വരുന്ന നിയമസഭാ സമ്മേളനത്തില്‍ അവതരിപ്പിക്കേണ്ട ബില്ലിൻ്റെ കരട് തയ്യാറാക്കുന്നതിനായി ആരോഗ്യവകുപ്പ് പ്രിൻസിപ്പല്‍ സെക്രട്ടറിയുടെ അധ്യക്ഷതയില്‍ നാലംഗ സമിതി രൂപീകരിക്കുമെന്ന് മന്ത്രി കെ മുരളീധരൻ വ്യക്തമാക്കി. ആരോഗ്യവകുപ്പ് പ്രിൻസിപ്പല്‍ സെക്രട്ടറി ചെയർമാനായുള്ള ഈ സമിതിയില്‍ ആരോഗ്യവകുപ്പ് ഡയറക്ടർ, ആരോഗ്യ വിദ്യാഭ്യാസ ഡയറക്ടർ, കെഎംഎസ്സിഎല്‍ മാനേജിങ് ഡയറക്ടർ എന്നിവർ അംഗങ്ങളായിരിക്കും.
സ്വകാര്യ ആശുപത്രി മാനേജ്മെൻ്റുകളുമായും മറ്റ് ബന്ധപ്പെട്ട വിഭാഗങ്ങളുമായും കൂടിയാലോചിച്ച്‌ ചികിത്സാച്ചെലവ് കുറയ്ക്കുന്നതിനുള്ള പ്രായോഗിക മാർഗങ്ങള്‍ സമിതി രൂപീകരിക്കും. ചികിത്സയുടെ ഗുണനിലവാരം, സുതാര്യത, രോഗികളുടെ സുരക്ഷ, സേവനങ്ങളുടെ ലഭ്യത എന്നിവ മെച്ചപ്പെടുത്തുന്നതിനുള്ള കൃത്യമായ ശുപാർശകള്‍ സമർപ്പിക്കാനാണ് സമിതിക്ക് നിർദേശം നല്‍കിയിട്ടുള്ളത്.
നിയന്ത്രണം വരുന്ന മേഖലകള്‍
സ്വകാര്യ ആശുപത്രികളിലെ ചികിത്സാച്ചെലവ്, മരുന്നുകളുടെ വില, ഡയഗ്നോസ്റ്റിക് പരിശോധനകളുടെ നിരക്ക്, മുറിവാടക, വിവിധ സർജറികള്‍ക്കും ചികിത്സാ പ്രൊസീജറുകള്‍ക്കുമുള്ള നിരക്ക് എന്നിവ വിശദമായി പരിശോധിച്ചാകും പുതിയ നിയമനിർമാണത്തിനുള്ള നിർദേശങ്ങള്‍ സമിതി തയ്യാറാക്കുക.കേരളത്തിൻ്റെ ആരോഗ്യരംഗത്ത് സ്വകാര്യ ആശുപത്രികള്‍ നിർണായക സാന്നിധ്യമാണെങ്കിലും, ചില ആശുപത്രികള്‍ പാവപ്പെട്ടവരെ അമിതമായി ചൂഷണം ചെയ്യുന്നതായി മന്ത്രി കെ മുരളീധരൻ തുറന്നടിച്ചു. താങ്ങാനാകാത്ത സ്വകാര്യ ആശുപത്രികളിലെ ബില്ലുമായി നിരവധി പേരാണ് ദിനംപ്രതി സഹായം തേടി എത്തുന്നത്.
ആരോഗ്യരംഗത്തെ ഇത്തരം അമിത കച്ചവട താല്‍പര്യങ്ങള്‍ അംഗീകരിക്കാനാകില്ലെന്നും മന്ത്രി വ്യക്തമാക്കി. ലബോറട്ടറി പരിശോധനകള്‍, സിടി, എംആർഐ സ്കാനിങ്ങുകള്‍ തുടങ്ങിയവയ്ക്ക് ഓരോ ആശുപത്രികളും തോന്നുംപടി നിരക്കുകള്‍ ഈടാക്കുന്ന പ്രവണതയ്ക്കും ഇതോടെ അവസാനമാകും.
മരുന്നുകള്‍ക്ക് എംആർപിയേക്കാള്‍ കുറഞ്ഞ വില
സ്വകാര്യ ആശുപത്രികളില്‍ രോഗികള്‍ക്ക് നല്‍കുന്ന മരുന്നുകള്‍ പരമാവധി വില്‍പ്പന വിലയേക്കാള്‍ കുറഞ്ഞ നിരക്കില്‍ ലഭ്യമാക്കണമെന്നതാണ് പുതിയ നിയമത്തിലെ പ്രധാന വ്യവസ്ഥകളിലൊന്ന്. ആശുപത്രികള്‍ കമ്പനികളില്‍ നിന്ന് മരുന്നുകള്‍ വാങ്ങുന്ന വിലയും രോഗികളില്‍ നിന്ന് ഈടാക്കുന്ന വിലയും സംബന്ധിച്ച സുതാര്യത ഉറപ്പാക്കുന്നതിനുള്ള സംവിധാനവും നിയമത്തില്‍ ഉള്‍പ്പെടുത്തും. പല കോർപ്പറേറ്റ് ആശുപത്രികളും കുറഞ്ഞ വിലയുള്ള മരുന്നുകള്‍ക്കും സർജിക്കല്‍ ഉപകരണങ്ങള്‍ക്കും എംആർപി നിരക്കില്‍ വൻ തുക രോഗികളില്‍ നിന്ന് ഈടാക്കി ലാഭമുണ്ടാക്കുന്ന പ്രവണതയ്ക്ക് ഈ നിർദേശം വലിയ തടയിടും.
ചികിത്സയ്ക്ക് മുൻപ് ചെലവ് വ്യക്തമാക്കണം
പുതിയ നിയമം പ്രാബല്യത്തില്‍ വരുന്നതോടെ രോഗികള്‍ക്ക് ചികിത്സ ആരംഭിക്കുന്നതിന് മുൻപ് തന്നെ ഏകദേശ ചെലവ് എത്രയാകുമെന്ന് ആശുപത്രികള്‍ വ്യക്തമാക്കേണ്ടി വരും. നല്‍കുന്ന ബില്ലില്‍ ഓരോ ഇനത്തിൻ്റെയും നിരക്ക് കൃത്യമായി രേഖപ്പെടുത്തുക, മരുന്നുകളുടെ വിലയില്‍ പൂർണ സുതാര്യത ഉറപ്പാക്കുക തുടങ്ങിയ കാര്യങ്ങള്‍ ആശുപത്രികളില്‍ നിർബന്ധമാക്കും. സർക്കാർ ആരോഗ്യ ഇൻഷുറൻസ് പദ്ധതികളുടെ സേവനം കൂടുതല്‍ സ്വകാര്യ ആശുപത്രികളിലേക്ക് വ്യാപിപ്പിക്കുന്നതിൻ്റെ സാധ്യതകളും നാലംഗ സമിതി വിലയിരുത്തും.ആരോഗ്യ മേഖലയിലെ സ്വകാര്യ ആശുപത്രികളുടെ വലിയ സംഭാവനകളെ സർക്കാർ പൂർണമായും അംഗീകരിക്കുന്നുണ്ടെങ്കിലും, ചികിത്സ സാധാരണക്കാർക്ക് താങ്ങാനാകാത്ത തരത്തില്‍ ചെലവേറിയതാകുന്ന സാഹചര്യം ഒഴിവാക്കണമെന്ന നിലപാടാണ് സർക്കാരിനുള്ളതെന്ന് മന്ത്രി കെ മുരളീധരൻ പറഞ്ഞു. സ്വകാര്യ ആശുപത്രികളുടെ പ്രവർത്തനച്ചെലവും പ്രായോഗിക ബുദ്ധിമുട്ടുകളും പരിഗണിച്ചുകൊണ്ട് തന്നെ, രോഗികളുടെ താല്‍പര്യം സംരക്ഷിക്കുന്ന തരത്തിലുള്ള ഒരു പ്രായോഗിക നിയന്ത്രണ സംവിധാനമാണ് സർക്കാർ ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.
