അബ്കാരി കേസില് ആൻ്റോ ആഗസ്റ്റിന് ആശ്വാസം : ഉപാധികളോടെ ജാമ്യം അനുവദിച്ച് കേരള ഹൈക്കോടതി
അനധികൃതമായി വ്യാജമദ്യമടക്കം വീട്ടില് സൂക്ഷിച്ച കേസില് ജയിലില് കഴിയുന്ന ആന്റോ അഗസ്റ്റിന് ഹൈക്കോടതി ജാമ്യം അനുവദിച്ചു. ജസ്റ്റിസ് കൗസർ എടപ്പഗത്തിന്റെ ബെഞ്ചാണ് ഹർജി അനുവദിച്ചത്. അതേസമയം മുട്ടില് മരം മുറിയിലെ വഞ്ചന കേസില് അഗസ്റ്റിൻ സഹോദരങ്ങള് നല്കിയ ഹർജി ഇന്ന് സുപ്രീംകോടതി പരിഗണിക്കും. ജസ്റ്റിസ് ജെ ബി പർദ്ദിവാല അധ്യക്ഷനായ ബെഞ്ച് ആണ് ഹർജി പരിഗണിക്കുന്നത്.
ചോറ്റാനിക്കര കോടതിയിലെ വിചാരണ തടയണമെന്ന് ആവശ്യപ്പെട്ടാണ് കേസിലെ ഒന്നാം പ്രതിയായ റോജി അഗസ്റ്റിൻ സുപ്രീംകോടതിയില് ഹർജി സമർപ്പിച്ചത്. നേരത്തെ ഹൈക്കോടതി ഈ ആവശ്യം തള്ളിയിരുന്നു. ഹൈക്കോടതി ഉത്തരവ് ഉടനടി സ്റ്റേ ചെയ്യണമെന്നായിരുന്നു ആവശ്യം. വിചാരണ ആറുമാസത്തില് പൂർത്തിയാക്കാൻ ചോറ്റാനിക്കര കോടതിക്ക് ഹൈക്കോടതി നിർദേശം നല്കിയിരുന്നു.
