വാട്‌സ്‌ആപ്പില്‍ ഇനി ഫോണ്‍ നമ്പര്‍ മറയ്ക്കാം ; സ്വകാര്യതയ്ക്ക് പുതിയ കരുത്തായി യൂസര്‍നെയിം ഫീച്ചർ

ഉപയോക്താക്കള്‍ ഏറെ നാളായി കാത്തിരുന്ന ഒരു സുപ്രധാന സ്വകാര്യതാ ഫീച്ചർ ഉടൻ അവതരിപ്പിക്കാനൊരുങ്ങുകയാണ് വാട്‍സ്‌ആപ്പ്. ഫോണ്‍ നമ്പർ പങ്കുവയ്ക്കാതെ തന്നെ മറ്റുള്ളവരുമായി ചാറ്റ് ചെയ്യാൻ കഴിയുന്ന “യൂസർനെയിം” സംവിധാനം വാട്‌സ്‌ആപ്പില്‍ എത്തുന്നു. ടെലഗ്രാം, ഇൻസ്റ്റഗ്രാം പോലുള്ള പ്ലാറ്റ്‌ഫോമുകളില്‍ കാണുന്ന രീതിയിലാണ് ഈ ഫീച്ചർ പ്രവർത്തിക്കുക. ഉപയോക്താക്കള്‍ക്ക് സ്വന്തം ഫോണ്‍ നമ്പറിന് പകരം ഒരു പ്രത്യേക യൂസർനെയിം പങ്കുവെച്ച്‌ മറ്റുള്ളവർക്ക് മെസേജ് അയയ്ക്കാനും സ്വീകരിക്കാനും കഴിയും.

ഇതുവരെ വാട്‌സ്‌ആപ്പില്‍ ആരെയെങ്കിലും ബന്ധപ്പെടാൻ ഫോണ്‍ നമ്പർ നിർബന്ധമായിരുന്നു. അതിനാല്‍ വ്യക്തിപരമായ നമ്പർ അന്യർക്കും നല്‍കേണ്ട സാഹചര്യം ഉണ്ടാകാറുണ്ട്. എന്നാല്‍ പുതിയ അപ്ഡേറ്റോടെ ഈ പ്രശ്‌നത്തിന് പരിഹാരം കാണാനാകുമെന്നാണ് റിപ്പോർട്ടുകള്‍ സൂചിപ്പിക്കുന്നത്. യൂസർനെയിം വഴി ഒരാളെ കണ്ടെത്തി ചാറ്റ് ആരംഭിക്കുമ്പോള്‍ ആ വ്യക്തിയുടെ മൊബൈല്‍ നമ്പർ കാണിക്കപ്പെടില്ല. പകരം അദേഹം തിരഞ്ഞെടുക്കുന്ന യൂസർനെയിം മാത്രമേ മറ്റ് ഉപയോക്താക്കള്‍ക്ക് ദൃശ്യമാകൂ.

വാട്‌സ്‌ആപ്പ് യൂസർനെയിം സംവിധാനം നിർബന്ധിതമല്ലെന്നതാണ് മറ്റൊരു പ്രത്യേകത. നിലവിലുള്ള രീതിയില്‍ ഫോണ്‍ നമ്പർ ഉപയോഗിച്ച്‌ തന്നെ അക്കൗണ്ട് തുടരാൻ ആഗ്രഹിക്കുന്നവർക്ക് അതിന് തടസമുണ്ടാകില്ല. യൂസർനെയിം വേണമെങ്കില്‍ മാത്രം സജ്ജമാക്കാം. ഇതോടെ സ്വകാര്യത കൂടുതല്‍ ആഗ്രഹിക്കുന്നവർക്കും ബിസിനസ് ആവശ്യങ്ങള്‍ക്കായി അന്യരുമായി ഇടപഴകുന്നവർക്കും പുതിയ സംവിധാനം ഏറെ സഹായകരമാകും.

യൂസർനെയിം എങ്ങനെ സജ്ജമാക്കാം?

പുതിയ ഫീച്ചർ ലഭ്യമായാല്‍ ഉപയോക്താക്കള്‍ക്ക് വളരെ എളുപ്പത്തില്‍ യൂസർനെയിം സജ്ജീകരിക്കാം. ആദ്യം ആൻഡ്രോയിഡ് ഫോണിലോ ഐഫോണിലോ വാട്‌സ്‌ആപ്പ് തുറക്കണം. തുടർന്ന് സെറ്റിംഗ്‍സ് മെനുവിലേക്ക് പ്രവേശിക്കണം. ആൻഡ്രോയ്‌ഡില്‍ സ്ക്രീനിന്‍റെ മുകളിലെ വലത് കോണിലുള്ള മൂന്ന്-ഡോട്ട് ഐക്കണില്‍ ടാപ്പ് ചെയ്‌ത് സെറ്റിംഗ്‍സ് തിരഞ്ഞെടുക്കാം. ഐഫോണില്‍ താഴെയുള്ള സെറ്റിംഗ്‍സ് ടാബിലാണ് ഈ ഓപ്ഷൻ ലഭിക്കുക.

ശേഷം പ്രൊഫൈല്‍ നെയിമില്‍ ടാപ്പ് ചെയ്‌ത് അക്കൗണ്ട് വിശദാംശങ്ങളിലേക്ക് കടക്കണം. അവിടെ യൂസർനെയിം എന്ന പുതിയ ഓപ്ഷൻ ലഭിക്കും. അതില്‍ ടാപ്പ് ചെയ്‌ത് ഇഷ്‌ടമുള്ള യൂസർനെയിം നല്‍കാം. യൂസർനെയിം തിരഞ്ഞെടുക്കുമ്പോള്‍ ചില നിർദ്ദിഷ്‌ട നിയമങ്ങള്‍ പാലിക്കണം.

യൂസർനെയിം തിരഞ്ഞെടുക്കുമ്പോള്‍ ശ്രദ്ധിക്കേണ്ട കാര്യങ്ങള്‍

യൂസർനെയിം മൂന്ന് മുതല്‍ 35 വരെ അക്ഷരങ്ങള്‍ ഉള്‍ക്കൊള്ളണം എന്ന് വാട്‌സ്‌ആപ്പ് നിർദ്ദേശിക്കുന്നു. അതില്‍ കുറഞ്ഞത് ഒരു ഇംഗ്ലീഷ് അക്ഷരം നിർബന്ധമായും ഉണ്ടായിരിക്കണം. അക്ഷരങ്ങള്‍, അക്കങ്ങള്‍, അണ്ടർസ്കോർ (_) എന്നിവയും പിരീഡ് (.) ചിഹ്നവും മാത്രം ഉപയോഗിക്കാനാകും.

അതേസമയം, ചില നിയന്ത്രണങ്ങളും ഉണ്ടാകും. “www” എന്ന് തുടങ്ങുന്ന യൂസർനെയിമുകള്‍ അനുവദിക്കില്ല. യൂസർനെയിമിന്‍റെ തുടക്കത്തിലോ അവസാനത്തിലോ പിരീഡ് ഉപയോഗിക്കാൻ പാടില്ല. തുടർച്ചയായി രണ്ട് പിരീഡുകളും അനുവദിക്കില്ല. കൂടാതെ .com, .org, .in പോലുള്ള ഡൊമെയ്ൻ എക്സ്റ്റൻഷനുകളില്‍ അവസാനിക്കുന്ന പേരുകളും നിരോധിച്ചേക്കും. ഉപയോക്താവ് ഒരു യൂസർനെയിം നല്‍കുന്നയുടൻ അതിന്‍റെ ലഭ്യത വാട്‌സ്‌ആപ്പ് സ്വമേധയാ പരിശോധിക്കും. പേര് ലഭ്യമാണെങ്കില്‍ സേവ് അല്ലെങ്കില്‍ ഡണ്‍ ബട്ടണ്‍ അമർത്തി അത് സ്ഥിരീകരിക്കാം. പിന്നീട് ഈ യൂസർനെയിം മറ്റുള്ളവരുമായി പങ്കുവെച്ച്‌ ഫോണ്‍ നമ്പർ നല്‍കാതെ തന്നെ ബന്ധപ്പെടാനാകും.

സ്വകാര്യതയ്ക്ക് കൂടുതല്‍ പ്രാധാന്യം

ഓണ്‍ലൈൻ സുരക്ഷയും സ്വകാര്യതയും സംബന്ധിച്ച ആശങ്കകള്‍ വർധിക്കുന്ന സാഹചര്യത്തിലാണ് വാട്‌സ്‌ആപ്പ് ഈ മാറ്റം കൊണ്ടുവരുന്നത്. പ്രത്യേകിച്ച്‌ അന്യരുമായി ഇടപഴകേണ്ടി വരുന്നവർക്ക് ഇത് ഏറെ ഗുണകരമാകും. ഓണ്‍ലൈൻ വില്‍പ്പനക്കാരും വാങ്ങുന്നവരും, കമ്മ്യൂണിറ്റി ഗ്രൂപ്പുകളിലെ അംഗങ്ങളും, പുതിയ ബിസിനസ് കോണ്‍ടാക്റ്റുകളും ഇനി ഫോണ്‍ നമ്പർ പങ്കുവയ്ക്കാതെ തന്നെ ആശയവിനിമയം നടത്താൻ കഴിയും.

ഇതിലൂടെ അനാവശ്യ കോളുകളും സ്പാം സന്ദേശങ്ങളും കുറയ്ക്കാനും സഹായമാകുമെന്നാണ് വിലയിരുത്തല്‍. ഫോണ്‍ നമ്പർ പുറത്തുവിടാതെ തന്നെ ആശയവിനിമയം നടത്താൻ കഴിയുന്നതിനാല്‍ വ്യക്തിപരമായ വിവരങ്ങള്‍ കൂടുതല്‍ സുരക്ഷിതമാക്കാനും സാധിക്കും.

അക്കൗണ്ട് സൈന്‍-ഇന്‍ ചെയ്യാന്‍ നമ്പർ തുടരും

യൂസർനെയിം സംവിധാനം വന്നാലും ഉപയോക്താവിന്‍റെ ഫോണ്‍ നമ്പർ പൂർണമായി ഒഴിവാക്കപ്പെടില്ല. അക്കൗണ്ട് സൈൻ-ഇൻ ചെയ്യുന്നതിനും റിക്കവറി ആവശ്യങ്ങള്‍ക്കുമായി നമ്പർ ഇപ്പോഴും അക്കൗണ്ടുമായി ബന്ധിപ്പിച്ചിരിക്കും. എന്നാല്‍ യൂസർനെയിം വഴി ബന്ധപ്പെടുന്ന ആളുകള്‍ക്ക് ആ നമ്പർ കാണിക്കില്ല എന്നതാണ് പ്രധാന മാറ്റം. ഒരു അക്കൗണ്ടിന് ഒരു യൂസർനെയിം മാത്രമേ അനുവദിക്കൂ. എന്നാല്‍ പിന്നീട് വേണമെങ്കില്‍ അത് മാറ്റാൻ സാധിക്കും. യൂസർനെയിം മാറ്റിയാലും പഴയ ചാറ്റുകളിലോ അക്കൗണ്ടിലോ യാതൊരു പ്രശ്‌നവും ഉണ്ടാകില്ലെന്ന് റിപ്പോർട്ടുകള്‍ വ്യക്തമാക്കുന്നു.

ഫീച്ചർ ലഭ്യമാകുന്നത് എപ്പോള്‍?

വാട്‌സ്‌ആപ്പ് ഇതിനകം തന്നെ ചില ആൻഡ്രോയ്‌ഡ്, ഐഒഎസ് ഉപയോക്താക്കള്‍ക്കായി യൂസർനെയിം ഫീച്ചർ പരീക്ഷണാടിസ്ഥാനത്തില്‍ പുറത്തിറക്കിത്തുടങ്ങിയിട്ടുണ്ട്. 2026-ല്‍ കൂടുതല്‍ ഉപയോക്താക്കള്‍ക്ക് ഇത് ലഭ്യമാകുമെന്നാണ് പ്രതീക്ഷിക്കുന്നത്. ഫീച്ചർ ലഭ്യമായതിന് ശേഷം ഉപയോക്താക്കള്‍ക്ക് തങ്ങളെ ഫോണ്‍ നമ്പർ വഴിയോ യൂസർനെയിം വഴിയോ അല്ലെങ്കില്‍ രണ്ടും ഉപയോഗിച്ചോ മറ്റുള്ളവർ കണ്ടെത്തണമെന്നത് തീരുമാനിക്കാൻ സാധിക്കും. സ്വകാര്യതയ്ക്ക് കൂടുതല്‍ പ്രാധാന്യം നല്‍കുന്ന ഇന്നത്തെ ഡിജിറ്റല്‍ കാലഘട്ടത്തില്‍ വാട്‌സ്‌ആപ്പിന്‍റെ ഈ നീക്കം വലിയ മാറ്റങ്ങള്‍ക്ക് തുടക്കമാകുമെന്നാണ് ടെക് ലോകത്തിന്‍റെ വിലയിരുത്തല്‍.