ഉപയോക്താക്കള്‍ക്ക് വൻ തിരിച്ചടി : ഫോണിലെ ‘ഫ്രീ’ എഐ കാലം കഴിയുന്നു ; ഇനി പണം മുടക്കേണ്ടി വരും
സ്മാർട്ട്ഫോണുകളിലെ അത്യാധുനിക നിർമ്മിതബുദ്ധി (AI) ഫീച്ചറുകള്‍ പൂർണ്ണമായും സൗജന്യമായി ഉപയോഗിക്കാൻ കഴിയുന്ന കാലഘട്ടം അവസാനിക്കുന്നു.
കഴിഞ്ഞ രണ്ട് വർഷമായി ഉപയോക്താക്കളെ ആകർഷിക്കാൻ സൗജന്യമായി നല്‍കിയിരുന്ന എഐ ടൂളുകള്‍ക്ക് ഇനി മുതല്‍ പണം ഈടാക്കാൻ സാംസങ്, ആപ്പിള്‍ തുടങ്ങിയ പ്രമുഖ ടെക് ഭീമന്മാർ തയ്യാറെടുക്കുന്നതായാണ് പുറത്തുവരുന്ന റിപ്പോർട്ടുകള്‍. അടുത്ത വർഷം മുതല്‍ പുതിയ സബ്‌സ്‌ക്രിപ്ഷൻ പ്ലാനുകളും യൂസേജ് പാക്കുകളും അവതരിപ്പിക്കാനാണ് കമ്പനികളുടെ നീക്കം.
കമ്പനികളില്‍ നിന്ന് ചോർന്ന വിവരങ്ങളെയും സോഫ്റ്റ്‌വെയർ കോഡുകളെയും അടിസ്ഥാനമാക്കി പ്രമുഖ ടെക് മാധ്യമങ്ങളാണ് ഇക്കാര്യം റിപ്പോർട്ട് ചെയ്തിരിക്കുന്നത്. എഐ സെർവറുകള്‍ പ്രവർത്തിപ്പിക്കുന്നതിനുള്ള ഭീമമായ ക്ലൗഡ് കമ്പ്യൂട്ടിംഗ് ചെലവുകളാണ് സൗജന്യ സേവനങ്ങളില്‍ നിന്ന് പിന്മാറാനും പണം ഈടാക്കാനും കമ്പനികളെ പ്രേരിപ്പിക്കുന്നത്. ചാറ്റ് ജിപിടി (ChatGPT), ക്ലോഡ് (Claude) എന്നിവയ്ക്ക് സമാനമായി ഫോണിലെ എഐ ഫീച്ചറുകള്‍ക്കും ഇനി ഉപയോക്താക്കള്‍ പണം നല്‍കേണ്ടി വരും.
സാംസങ് തങ്ങളുടെ ‘ഗാലക്സി എഐ’ (Galaxy AI) സേവനങ്ങള്‍ക്കായി ‘ഗാലക്സി എഐ പ്രീമിയം’ (Galaxy AI Premium) എന്ന പേരില്‍ പ്രതിമാസ സബ്‌സ്‌ക്രിപ്ഷൻ പ്ലാൻ പരീക്ഷിക്കുന്നതായാണ് വിവരം. പ്രതിമാസം 4.99 ഡോളർ (ഏകദേശം 420 രൂപ) അല്ലെങ്കില്‍ വാർഷിക പ്ലാനായി 47.99 ഡോളർ (ഏകദേശം 4,000 രൂപ) എന്നിങ്ങനെയായിരിക്കും നിരക്കുകളെന്നാണ് സൂചന. അടുത്ത വർഷം പുറത്തിറങ്ങുന്ന ഗാലക്സി S27 സീരീസിനൊപ്പമായിരിക്കും ഈ പെയ്ഡ് പ്ലാൻ ഔദ്യോഗികമായി അവതരിപ്പിക്കുക.
അതേസമയം, സാംസങ്ങിന്റെ അടിസ്ഥാന എഐ ടൂളുകളായ ബ്രൗസിംഗ് അസിസ്റ്റ് (വെബ്‌പേജ് സംഗ്രഹം), ഫോട്ടോ അസിസ്റ്റ്, നൗ ബ്രീഫ് എന്നിവ സൗജന്യമായി തുടരുമെങ്കിലും ഇവയ്ക്ക് പ്രതിമാസ ഉപയോഗ പരിധി നിശ്ചയിക്കും. പണമടയ്ക്കുന്ന പ്രീമിയം ഉപയോക്താക്കള്‍ക്ക് നാല് മടങ്ങ് അധിക ഉപയോഗ പരിധി ലഭിക്കുന്നതിനൊപ്പം, ഫോട്ടോകളില്‍ നിന്ന് വീഡിയോ നിർമ്മിക്കുന്ന ‘ജെൻ വീഡിയോ’ (Gen Video), ആപ്പുകള്‍ക്കിടയില്‍ സങ്കീർണ്ണമായ ജോലികള്‍ സ്വയം ചെയ്യുന്ന ‘ബിക്സ്ബി ആക്ഷൻ’ (Bixby Action) തുടങ്ങിയ എക്സ്ക്ലൂസീവ് ഫീച്ചറുകളും ലഭിക്കും.
ആപ്പിള്‍ കുറച്ചുകൂടി വ്യത്യസ്തമായ രീതിയിലാണ് പണം ഈടാക്കാൻ ഒരുങ്ങുന്നത്. അടിസ്ഥാന ‘ആപ്പിള്‍ ഇന്റലിജൻസ്’ (Apple Intelligence), സിരി (Siri) ടൂളുകള്‍ എന്നിവ സൗജന്യമായി തുടരുമെങ്കിലും, കൂടുതല്‍ പ്രോസസ്സിംഗ് ശേഷി ആവശ്യമുള്ള ക്രിയേറ്റീവ് ആപ്പുകള്‍ക്കായി ‘ഇന്റലിജൻസ് യൂസേജ് പാക്ക്’ (Intelligence Usage Pack) എന്ന പേരില്‍ ടോപ്പ്-അപ്പ് ഓപ്ഷനുകള്‍ ആപ്പിള്‍ അവതരിപ്പിക്കും. 49.99 ഡോളർ (ഏകദേശം 4,200 രൂപ) വിലവരുന്ന ഈ ഒറ്റത്തവണ പാക്കിലൂടെ അധിക എഐ പ്രോസസ്സിംഗ് ടോക്കണുകള്‍ ലഭിക്കും. ലോജിക് പ്രോ (Logic Pro), ഫൈനല്‍ കട്ട് പ്രോ (Final Cut Pro) തുടങ്ങിയ പ്രൊഫഷണല്‍ ആപ്പുകളിലായിരിക്കും ഇവ ആദ്യം ലഭ്യമാകുക.
ചുരുക്കത്തില്‍, സാധാരണക്കാരായ ഉപയോക്താക്കള്‍ക്ക് അടിസ്ഥാന എഐ സൗകര്യങ്ങള്‍ പരിമിതികളോടെ സൗജന്യമായി തുടരുമെങ്കിലും, എഐ ടൂളുകള്‍ നിരന്തരം ഉപയോഗിക്കുന്നവർക്കും കണ്ടന്റ് ക്രിയേറ്റർമാർക്കും ഇനി മുതല്‍ പോക്കറ്റ് കാലിയാകുമെന്നുറപ്പാണ്.
