ബാവലിയില്‍ മാരക മയക്കുമരുന്നായ എം.ഡി.എം.എയുമായി 4 പേര്‍ പിടിയില്‍
കാട്ടിക്കുളം : ബാവലിയില്‍ വന്‍ എം.ഡി.എം.എ വേട്ട. 32.78ഗ്രാം എം.ഡി.എം.എയുമായി നാല് പേരെ അറസ്റ്റ് ചെയ്തു. കര്‍ണാടക ഹസ്സന്‍ എച്ച്.ഡി കോട്ട ചേരുനംകുന്നേല്‍ വീട്ടില്‍ എന്‍.എ.അഷ്‌ക്കര്‍ (27), കല്‍പ്പറ്റ അമ്പിലേരി പുതുക്കുടി വീട്ടില്‍ പി.കെ.അജ്മല്‍ മുഹമ്മദ് (29), കല്‍പ്പറ്റ ഗൂഡാലയികുന്ന്, പള്ളിത്താഴത്ത് വീട്ടില്‍ ഇഫ്‌സല്‍ നിസാര്‍(26), കര്‍ണാടക ഹസ്സന്‍ അഫ്‌നന്‍ വീട്ടില്‍ എം.മുസ്‌ക്കാന(24) എന്നിവരെയാണ് തിരുനെല്ലി പോലീസും ജില്ലാ ലഹരി വിരുദ്ധ സ്‌ക്വാഡും ചേര്‍ന്ന് അറസ്റ്റ് ചെയ്തത്.
വിപണിയില്‍ ലക്ഷങ്ങള്‍ വില മതിക്കുന്ന എം.ഡി.എം.എ ഇവര്‍ ബാംഗ്ലൂരില്‍ നിന്ന് വാങ്ങി വില്‍പ്പനക്കും ഉപയോഗത്തിനുമായി സംസ്ഥാനത്തേക്ക് കടത്തുകയായിരുന്നു.
ഇന്നലെ വൈകീട്ടോടെയാണ് സംഭവം. ബാവലി-മീന്‍കൊല്ലി റോഡ് ജംഗ്ഷനില്‍ വാഹന പരിശോധനക്കിടെയാണ് ഇവര്‍ പിടിയിലായത്. കര്‍ണാടകയില്‍ നിന്നും കാട്ടിക്കുളം ഭാഗത്തേക്ക് ഓടിച്ചു വന്ന KA -53-Z-2574 നമ്പര്‍ സിഫ്റ്റ് കാറിന്റെ ഡാഷ്ബോക്‌സിനുള്ളില്‍ നിന്നാണ് എം.ഡി.എം.എ കണ്ടെടുത്തത്.
തിരുനെല്ലി ഇന്‍സ്പെക്ടര്‍ എസ്.എച്ച്.ഒ ലാല്‍ സി.ബേബി, എസ് ഐ സജിമോന്‍ പി. സെബാസ്റ്റ്യന്‍, സി.പി.ഒമാരായ ഹരീഷ്, നിധീഷ്, ഷാലുമോള്‍ എന്നിവരാണ് പോലീസ് സംഘത്തില്‍ ഉണ്ടായിരുന്നത്.
