ബത്തേരിയിൽ ഓട്ടോറിക്ഷ മറിഞ്ഞ് രണ്ടുവയസ്സുകാരി മരിച്ചു
ബത്തേരി : കാറില്‍ തട്ടി നിയന്ത്രണം വിട്ട ഓട്ടോറിക്ഷ മറിഞ്ഞുണ്ടായ അപകടത്തില്‍ രണ്ടു വയസ്സുകാരിക്ക് ദാരുണാന്ത്യം. നായ്ക്കട്ടി പിലാക്കാവ് ഊരാളി ഉന്നതിയിലെ രാജേഷിന്റേയും, സുമയുടേയും മകള്‍ രാജലക്ഷ്മി (2) ആണ് മരിച്ചത്.
ഇന്ന് രാവിലെ എട്ടുമണിയോടെ സുല്‍ത്താന്‍ ബത്തേരി കോട്ടക്കുന്നിന് സമീപമാണ് അപകടം.
ഓട്ടോറിക്ഷയുടെ മുന്നിലായുണ്ടായിരുന്ന കാര്‍ നിര്‍ത്തിയ ശേഷം അശ്രദ്ധമായി തിരിക്കുന്നതിനിടെ ഓട്ടോറിക്ഷ കാറില്‍ തട്ടി മറിയുകയായിരുന്നു. തുടര്‍ന്ന് ഓട്ടോറിക്ഷയുടെ അടിയില്‍പ്പെട്ട് ഗുരുതര പരിക്കേറ്റ കുട്ടിയെ ആശുപത്രിയിലെത്തിച്ചെങ്കിലും രക്ഷിക്കാനായില്ല. അപകടത്തില്‍ മറ്റാര്‍ക്കും കാര്യമായ പരിക്കില്ലെന്നാണ് പ്രാഥമിക വിവരം.
