ജെമിനി ഉപയോഗിക്കുന്നവര്‍ ശ്രദ്ധിക്കുക ! ഒക്ടോബര്‍ 9 മുതല്‍ വലിയ മാറ്റം, സൗജന്യ ഉപയോക്താക്കള്‍ക്ക് തിരിച്ചടി
ഗൂഗിള്‍ ജെമിനി ഉപയോഗിക്കുന്നവർക്കായി പുതിയ നിയന്ത്രണങ്ങള്‍ പ്രഖ്യാപിച്ച്‌ ഗൂഗിള്‍. ഒക്ടോബർ 9 മുതല്‍ സൗജന്യമായി ജെമിനി ഉപയോഗിക്കുന്നവർക്ക് ‘ഫ്ലാഷ്-ലൈറ്റ്’ മോഡല്‍ മാത്രമേ ലഭ്യമാകൂ.നിലവില്‍ സൗജന്യ ഉപയോക്താക്കള്‍ക്ക് ലഭിക്കുന്ന ‘ഫ്ലാഷ്’, ‘പ്രോ’ മോഡലുകളിലേക്കുള്ള പ്രവേശനം ഇതോടെ അവസാനിക്കും.
സൗജന്യ ഉപയോക്താക്കള്‍ക്ക് നിയന്ത്രണം
ഗൂഗിള്‍ പുറത്തിറക്കിയ പുതിയ വിവരങ്ങള്‍ പ്രകാരം, ഗൂഗിള്‍ എഐ സബ്‌സ്‌ക്രിപ്ഷൻ ഇല്ലാത്ത ഉപയോക്താക്കള്‍ക്ക് ഒക്ടോബർ 9 മുതല്‍ ഫ്ലാഷ്-ലൈറ്റ് മാത്രമായിരിക്കും ലഭിക്കുക. കൂടുതല്‍ ശേഷിയുള്ള ഫ്ലാഷ്, പ്രോ മോഡലുകള്‍ സൗജന്യ ശ്രേണിയില്‍ നിന്ന് ഒഴിവാക്കും. പ്രതിമാസം 4.99 ഡോളർ, ഏകദേശം 500 രൂപ, നിരക്കുള്ള എഐ പ്ലാനിലും മാറ്റമുണ്ട്. ഈ പ്ലാൻ ഉപയോഗിക്കുന്നവർക്ക് ഫ്ലാഷ്-ലൈറ്റ്, ഫ്ലാഷ് മോഡലുകള്‍ തുടർന്നും ലഭിക്കും. എന്നാല്‍ പ്രോ മോഡലിന്‍റെ സൗകര്യം ഇനി ലഭിക്കില്ല. മാറ്റം ഏതുതീയതി മുതല്‍ തങ്ങളുടെ അക്കൗണ്ടില്‍ ബാധകമാകുമെന്ന് ഗൂഗിള്‍ ബന്ധപ്പെട്ട ഉപയോക്താക്കളെ ഇമെയില്‍ വഴി അറിയിക്കും.
സങ്കീർണമായ ചോദ്യങ്ങള്‍ക്ക് കൂടുതല്‍ ഉപയോഗം
ജെമിനിയുടെ ഉപയോഗപരിധി നിർണയിക്കുന്ന രീതിയിലും ഗൂഗിള്‍ നേരത്തെ മാറ്റം വരുത്തിയിരുന്നു. ഓരോ ചോദ്യത്തിനും ആവശ്യമായ കംപ്യൂട്ടിങ് ശേഷിയുടെ അടിസ്ഥാനത്തിലാണ് ഉപയോഗം കണക്കാക്കുന്നത്. സങ്കീർണമായ ചോദ്യങ്ങള്‍, ദൈർഘ്യമേറിയ സംഭാഷണങ്ങള്‍, കൂടുതല്‍ ശേഷിയുള്ള മാതൃകകളുടെ ഉപയോഗം എന്നിവ കൂടുതല്‍ ഉപയോഗ പരിധി ചെലവഴിക്കാൻ കാരണമാകും.
പ്രോ ഉപയോക്താക്കള്‍ക്ക് ‘ഡീപ് തിങ്ക്’
അതേസമയം, ഇതുവരെ ഏറ്റവും ഉയർന്ന എഐ അള്‍ട്രാ പ്ലാനില്‍ മാത്രമുണ്ടായിരുന്ന ‘ഡീപ് തിങ്ക്’ ഫീച്ചർ ഇനി എഐ പ്രോ ഉപയോക്താക്കള്‍ക്കും ലഭിക്കും. പ്രതിമാസം 19.99 ഡോളർ, ഏകദേശം 1,900 രൂപ, നിരക്കുള്ള എഐ പ്രോ പ്ലാനിലാണ് ഈ സൗകര്യം എത്തുന്നത്. കൂടുതല്‍ സങ്കീർണമായ ചോദ്യങ്ങള്‍ പരിഹരിക്കുന്നതിനായി ഒരേസമയം ഒന്നിലധികം റീസണിങ് പ്രക്രിയകള്‍ ഉപയോഗിക്കുന്ന സാങ്കേതികവിദ്യയാണ് ഡീപ് തിങ്ക്. പ്രോ മാതൃകയുടെ സഹായത്തോടെയാണ് ഇത് പ്രവർത്തിക്കുന്നത്.
ചിന്താശേഷി തിരഞ്ഞെടുക്കാൻ പുതിയ ഓപ്ഷനുകള്‍
ജെമിനി ആപ്പില്‍ ചോദ്യങ്ങള്‍ക്ക് ഉത്തരം നല്‍കാൻ എത്രത്തോളം കംപ്യൂട്ടിങ് ശേഷി ഉപയോഗിക്കണമെന്ന് ഉപയോക്താക്കള്‍ക്ക് തീരുമാനിക്കാനാകുന്ന പുതിയ സൗകര്യവും ഗൂഗിള്‍ പരീക്ഷിക്കുന്നുണ്ട്. ‘ലോ’, ‘മീഡിയം’, ‘ഹൈ’ എന്നിങ്ങനെ മൂന്ന് ചിന്താശേഷി ക്രമീകരണങ്ങള്‍ അവതരിപ്പിക്കാനാണ് നീക്കം. ഉയർന്ന നിലവാരം തിരഞ്ഞെടുക്കുമ്പോള്‍ കൂടുതല്‍ കംപ്യൂട്ടിങ് ശേഷി ഉപയോഗിക്കേണ്ടിവരുമെന്നതിനാല്‍ ഉപയോക്താവിന്റെ ഉപയോഗപരിധിയും വേഗത്തില്‍ കുറയാൻ സാധ്യതയുണ്ട്.
ജെമിനി 4 അർഗോണിലും പരീക്ഷണം
ഇതിനിടെ, ഗൂഗിള്‍ അടുത്ത തലമുറയിലെ ജെമിനി 4 അർഗോണ്‍ മാതൃകയിലും പരീക്ഷണം നടത്തുകയാണ്. ‘ഫെയർവിൻഡ്’ പദ്ധതിയുടെ ഭാഗമായി തിരഞ്ഞെടുത്ത സൈബർ സുരക്ഷാ വിദഗ്ധർക്കാണ് നിലവില്‍ ഇത് പരീക്ഷണാടിസ്ഥാനത്തില്‍ ലഭ്യമാക്കിയിരിക്കുന്നത്. പിന്നീട് പണമടച്ച്‌ ഉപയോഗിക്കുന്ന എപിഐ ഉപയോക്താക്കള്‍ക്കും എഐ അള്‍ട്രാ ഉപയോക്താക്കള്‍ക്കും അർഗോണ്‍ ലഭ്യമാക്കാനാണ് ഗൂഗിളിന്റെ നീക്കം. എന്നാല്‍ ഇത് എഐ പ്രോ പ്ലാനിന്റെ ഭാഗമാകുമോ, അതോ അതിന് മുകളിലുള്ള പുതിയ ശ്രേണിയായി അവതരിപ്പിക്കുമോ എന്ന കാര്യത്തില്‍ ഗൂഗിള്‍ ഇതുവരെ വ്യക്തത നല്‍കിയിട്ടില്ല.
