വീട്ടില്‍ സ്ഥിരമായി ഉപയോഗിക്കുന്ന ഈ സാധനങ്ങള്‍ ക്യാൻസര്‍ സാധ്യത വര്‍ധിപ്പിച്ചേക്കാം
ഒരു ദിവസം പെട്ടെന്ന് ഉണ്ടാകുന്ന ഒന്നല്ല ക്യാൻസർ. അനാരോഗ്യകരമായ ഭക്ഷണ-ജീവിതശൈലീ രീതികള്‍, ഹോർമോണ്‍ അസന്തുലിതാവസ്ഥ, ദുർബലമായ പ്രതിരോധശേഷി, ചികിത്സ തേടുന്നതിലുണ്ടാകുന്ന കാലതാമസം, ഹാനികരമായ രാസവസ്തുക്കളുമായുള്ള നിരന്തര സമ്പർക്കം, തുടങ്ങി പല ഘടകങ്ങളും ക്യാൻസറിന് കാരണമാകുന്നുണ്ട്. ഭക്ഷണങ്ങള്‍ മാത്രമല്ല വീട്ടില്‍ നമ്മള്‍ സ്ഥിരമായി ഉപയോഗിക്കുന്ന ചില സാധനങ്ങളും ക്യാൻസർ സാധ്യത കൂട്ടാം.
ഈ സാധനങ്ങള്‍ എന്തെല്ലാമാണെന്ന് അറിഞ്ഞാലോ?
ഉപയോഗിച്ച എണ്ണ വീണ്ടും ഉപയോഗിക്കുന്നത് ഒഴിവാക്കുക.
തുടർച്ചയായി വീണ്ടും ചൂടാക്കുന്നതോ ഡീപ് ഫ്രൈയിംഗിനായി ഉപയോഗിക്കുന്നതോ ആയ എണ്ണയില്‍ ആല്‍ഡിഹൈഡുകള്‍, ഓക്സിഡൈസ്ഡ് കൊഴുപ്പുകള്‍ തുടങ്ങിയ ഹാനികരമായ സംയുക്തങ്ങള്‍ രൂപപ്പെട്ടേക്കാം. ഇവ കാലക്രമേണ ശരീരത്തില്‍ വീക്കം, ഓക്സിഡേറ്റീവ് സ്ട്രെസ് എന്നിവ വർദ്ധിപ്പിക്കാൻ കാരണമായേക്കാം. ഉപയോഗിച്ച എണ്ണ വീണ്ടും ഉപയോഗിക്കുന്നത് ഒഴിവാക്കുക.
പാനുകള്‍ അമിതമായി ചൂടാക്കാനോ കോട്ടിംഗ് കേടായ ശേഷമോ ഉപയോഗിക്കാൻ പാടില്ല
നോണ്‍-സ്റ്റിക്ക് പാനുകള്‍ മിക്ക വീടുകളിലും പതിവായി ഉപയോഗിക്കാറുണ്ട്. ദോശ, ചപ്പാത്തി എന്നിവ ഉണ്ടാക്കാൻ അവ ഉപയോഗിക്കുന്നു. എന്നാല്‍ പാനുകള്‍ വളരെ സൗകര്യപ്രദമാണെങ്കിലും അവ അമിതമായി ചൂടാക്കാനോ കോട്ടിംഗ് കേടായ ശേഷമോ ഉപയോഗിക്കാൻ പാടില്ല. ഉയർന്ന താപനിലയില്‍ ചൂടാക്കുമ്പോള്‍ ആരോഗ്യത്തിന് ഹാനികരമായേക്കാവുന്ന ചില കണികകള്‍ ഇവയില്‍ നിന്ന് പുറത്തുവന്നേക്കാം. കോട്ടിംഗ് കേടായ പാനുകള്‍ മാറ്റി പുതിയത് വാങ്ങുക.
പ്ലാസ്റ്റിക് പാത്രങ്ങള്‍ക്ക് പഴയ മണമോ ദുർഗന്ധമോ വരികയോ, നിറം മങ്ങുകയോ ചെയ്താല്‍ ഒഴിവാക്കുക.
ഭക്ഷണസാധനങ്ങള്‍ സൂക്ഷിക്കാനാണ് പ്രധാനമായും പ്ലാസ്റ്റിക് പാത്രങ്ങള്‍ ഉപയോഗിക്കുന്നത്. എന്നാല്‍, ചൂടുള്ള ഭക്ഷണം ഇവയില്‍ സൂക്ഷിക്കുമ്പോഴോ മൈക്രോവേവില്‍ വച്ച്‌ ഭക്ഷണം ചൂടാക്കുമ്പോഴോ ആരോഗ്യപരമായ അപകടസാധ്യത വർദ്ധിക്കുന്നു. പ്രത്യേകിച്ച്‌ പഴകിയതോ മൈക്രോവേവില്‍ ഉപയോഗിക്കാൻ അനുയോജ്യമല്ലാത്തതോ ആയ പാത്രങ്ങളാണെങ്കില്‍ ചൂട് കാരണം ബി.പി.എ (BPA) പോലുള്ള രാസവസ്തുക്കളോ മൈക്രോപ്ലാസ്റ്റിക് കണികകളോ ഭക്ഷണത്തില്‍ കലരാനുള്ള സാധ്യതയുണ്ട്. ഇത്തരം രാസവസ്തുക്കള്‍ ശരീരത്തിലെ ഹോർമോണുകളുടെ പ്രവർത്തനത്തെയും കോശങ്ങളുടെ ദീർഘകാല ആരോഗ്യത്തെയും പ്രതികൂലമായി ബാധിച്ചേക്കാം.
പ്ലാസ്റ്റിക് കുപ്പികളെ തുടർച്ചയായി ആശ്രയിക്കുന്നത് ഒഴിവാക്കണം
പ്ലാസ്റ്റിക് കുപ്പികള്‍ ചൂടിലോ നേരിട്ടുള്ള സൂര്യപ്രകാശത്തിലോ വയ്ക്കാനോ തുടർച്ചയായി ഉപയോഗിക്കാനോ പാടില്ല. ഇടയ്ക്കിടെയുള്ള ഉപയോഗം കാര്യമായ ദോഷമുണ്ടാക്കാൻ സാധ്യതയില്ലെങ്കിലും, ചൂടായതോ വീണ്ടും ഉപയോഗിക്കുന്നതോ ആയ പ്ലാസ്റ്റിക് കുപ്പികളെ തുടർച്ചയായി ആശ്രയിക്കുന്നത് ഒഴിവാക്കണം.ചില മേക്കപ്പ് ഉല്‍പ്പന്നങ്ങളില്‍ വളരെ ചെറിയ അളവിലുള്ള പ്രത്യേക രാസഘടകങ്ങള്‍ അടങ്ങിയിട്ടുണ്ടാകാം
ദിവസവും ഉപയോഗിക്കുന്ന മിക്ക മേക്കപ്പ് ഉല്‍പ്പന്നങ്ങളും നേരിട്ട് ക്യാൻസറിന് കാരണമാകുന്നില്ല എങ്കിലും, ചില ഉല്‍പ്പന്നങ്ങളില്‍ വളരെ ചെറിയ അളവിലുള്ള പ്രത്യേക രാസഘടകങ്ങള്‍ അടങ്ങിയിട്ടുണ്ടാകാം. നിർമ്മാണവേളയില്‍ ലെഡ്, ആർസെനിക്, കാഡ്മിയം എന്നിവയുടെ അംശങ്ങള്‍ അവിചാരിതമായി പിഗ്മെന്റുകളിലും പൊടികളിലും കലരാൻ സാധ്യതയുണ്ട്.
ഭക്ഷണം പൊതിയാൻ ഹോട്ടലുകളില്‍ അലുമിനിയം ഫോയില്‍ ഉപയോഗിക്കാറുണ്ട്
ഭക്ഷണം പൊതിയാൻ ഹോട്ടലുകളില്‍ അലുമിനിയം ഫോയില്‍ ഉപയോഗിക്കാറുണ്ട്. ഇടയ്ക്കിടെയുള്ള ഉപയോഗം വലിയ പ്രശ്നമല്ലെങ്കിലും, അസിഡിറ്റി കൂടുതലുള്ള (പുളിരസമുള്ള) ഭക്ഷണസാധനങ്ങള്‍ ആവർത്തിച്ച്‌ അലുമിനിയം ഫോയിലില്‍ പൊതിഞ്ഞു സൂക്ഷിക്കുന്നത്, ഭക്ഷണത്തിലേക്ക് അലുമിനിയം അംശം കലരാനുള്ള സാധ്യത വർദ്ധിപ്പിക്കുന്നു. അലുമിനിയം ഫോയില്‍ നേരിട്ട് ക്യാൻസറിന് കാരണമാകുമെന്ന് തെളിയിക്കപ്പെട്ടിട്ടില്ലെങ്കിലും, അനാവശ്യമായ ദീർഘകാല ഉപയോഗം ഒഴിവാക്കുന്നതാണ് ഉചിതം. ഇതിനു പകരം സ്റ്റീല്‍ പാത്രങ്ങളില്‍ ഭക്ഷണം സൂക്ഷിക്കാവുന്നതാണ്.
