അടുത്ത പമ്പുവരെ എത്താം എന്ന കണക്കുകൂട്ടലിൽ വാഹനം റിസര്‍വില്‍ ഓടിക്കല്ലേ ; പണികിട്ടും!
ഇന്ധനം തീരാറായിട്ടും ‘അടുത്ത പമ്പുവരെ എത്താം’ എന്ന കണക്കുകൂട്ടലിലാണോ യാത്ര? റിസർവില്‍ ഓടുന്നത് പതിവാക്കിയാല്‍ ഫ്യുവല്‍ പമ്പിന്റെ ആയുസിനെ ബാധിച്ചേക്കാം.ഫ്യുവല്‍ ഇൻഡിക്കേറ്ററിലെ സൂചി താഴ്ന്നു.
അഴുക്കിനെക്കുറിച്ചുള്ള ധാരണ ശരിയാണോ?
‘റിസർവില്‍ ഓടിച്ചാല്‍ ടാങ്കിന്റെ അടിയിലെ അഴുക്ക് മുഴുവൻ പമ്പ് വലിച്ചെടുക്കും’ എന്നൊരു ധാരണയുണ്ട്. അത് പൂർണമായി ശരിയല്ല. സാധാരണയായി ടാങ്കിന്റെ താഴെയുള്ള ഭാഗത്തുനിന്നുതന്നെയാണ് പമ്പ് ഇന്ധനം എടുക്കുന്നത്.
എന്നാല്‍ ഇന്ധനത്തിലെ മാലിന്യങ്ങള്‍ ഫില്‍റ്ററിലോ സ്ട്രെയിനറിലോ അടിഞ്ഞുകൂടാം. അതിനാല്‍ ഗുണനിലവാരമുള്ള ഇന്ധനം ഉപയോഗിക്കുക. നിർമാതാവ് നിർദേശിക്കുന്ന സമയത്ത് ഫില്‍റ്ററും പരിശോധിക്കുക.
പമ്പ് പ്രശ്നത്തിലാണോ?
ലക്ഷണങ്ങള്‍ നോക്കാം
► സ്റ്റാർട്ടാകാൻ വൈകുന്നു.
► പിക്കപ്പ് കുറയുന്നു.
► കയറ്റത്തില്‍ കരുത്ത് കുറയുന്നു.
► ഉയർന്ന വേഗത്തില്‍ എൻജിൻ മടിക്കുന്നു.
► ഓടുന്നതിനിടെ എൻജിൻ ഓഫാകുന്നു.
ഇവ ഫ്യുവല്‍ പമ്പിന്റെ തകരാറുകൊണ്ടു മാത്രമാകണമെന്നില്ല. മറ്റു പ്രശ്നങ്ങളും സമാന ലക്ഷണങ്ങള്‍ നല്‍കാം. പരിശോധനയിലൂടെ കാരണം ഉറപ്പാക്കണം.
ലൈറ്റ് തെളിഞ്ഞാല്‍ പേടിക്കേണ്ട
റിസർവ് ലൈറ്റും തെളിഞ്ഞു. എന്നിട്ടും യാത്ര തുടരുന്നവർ ഏറെയാണ്. അടുത്ത പമ്പുവരെ എത്താമെന്ന പ്രതീക്ഷയാണ് പലർക്കും. വല്ലപ്പോഴും ഇങ്ങനെ സംഭവിക്കുന്നതുകൊണ്ട് ഫ്യുവല്‍ പമ്പ് കേടാകില്ല. എന്നാല്‍ ടാങ്കിലെ ഇന്ധനം തീരുന്നതുവരെ ഓടിക്കുന്നത് പതിവാക്കുന്നത് നല്ലതല്ല.
ഫ്യുവല്‍ പമ്പിനും വേണം ‘കൂളിംഗ് ’
ആധുനിക പെട്രോള്‍, ഡീസല്‍ വാഹനങ്ങളില്‍ ഫ്യുവല്‍ പമ്പ് സാധാരണയായി ടാങ്കിനുള്ളിലാണ്. ടാങ്കില്‍നിന്ന് ആവശ്യമായ മർദത്തില്‍ എൻജിനിലേക്ക് ഇന്ധനം എത്തിക്കുകയാണ് ജോലി.
പമ്പിലൂടെ ഒഴുകുന്ന ഇന്ധനം അതിന്റെ ചൂട് നിയന്ത്രിക്കാനും സഹായിക്കുന്നു. ആവശ്യത്തിന് ഇന്ധനം ലഭിക്കാത്ത സാഹചര്യം ആവർത്തിച്ചാല്‍ പമ്പിന്റെ തേയ്മാനം കൂടാം. ആയുസും കുറയാം.
കയറ്റവും വളവും പ്രശ്നമാകാം
ടാങ്കില്‍ ഇന്ധനം തീരെ കുറവാണെന്നിരിക്കട്ടെ. കുത്തനെയുള്ള കയറ്റമോ, ഇറക്കമോ, വളവോ എത്തിയാല്‍ ഇന്ധനം ടാങ്കിനുള്ളില്‍ ഒരു വശത്തേക്ക് നീങ്ങാം. ചില സാഹചര്യങ്ങളില്‍ പമ്പിന് ആവശ്യത്തിന് ഇന്ധനം കിട്ടാതെ വരാം. ഇതാണ് ‘ഫ്യുവല്‍ സ്റ്റാർവേഷൻ ’. പിക്കപ്പ് കുറയാം. എൻജിൻ മടിച്ചേക്കാം. ചിലപ്പോള്‍ വാഹനം ഓഫാകുകയും ചെയ്യാം.റിസർവ് ലൈറ്റ് തെളിഞ്ഞതുകൊണ്ടുമാത്രം ഫ്യുവല്‍ പമ്പ് കേടാകില്ല. അത് ഇന്ധനം നിറയ്ക്കാനുള്ള മുന്നറിയിപ്പായി കാണുക.
ലൈറ്റ് തെളിഞ്ഞശേഷം എത്രദൂരം പോകാമെന്നതിന് എല്ലാ വാഹനങ്ങള്‍ക്കും ഒരേ കണക്കില്ല. മോഡല്‍, മൈലേജ്, ട്രാഫിക്, റോഡിന്റെ സ്വഭാവം, ഡ്രൈവിംഗ് രീതി എന്നിവയെല്ലാം അതിനെ ബാധിക്കും. അതിനാല്‍ ‘ഇനിയും ഇത്ര കിലോമീറ്റർ പോകും’ എന്ന കണക്കില്‍ യാത്ര നീട്ടേണ്ട.
ഓർമിക്കാം
► റിസർവ് പതിവാക്കരുത്.
► ലൈറ്റ് തെളിഞ്ഞാല്‍ ഇന്ധനം നിറയ്ക്കുക.
► ടാങ്ക് പൂർണമായി കാലിയാക്കരുത്.
► ദീർഘയാത്രയ്ക്കുമുമ്പ് ഇന്ധനം ഉറപ്പാക്കുക.
► ഫ്യുവല്‍ ഫില്‍റ്റർ സമയത്ത് പരിശോധിക്കുക.
കാല്‍ ടാങ്കാകുമ്പോള്‍ ഇന്ധനം നിറയ്ക്കുന്നത് നല്ല ശീലമാണ്. എന്നാല്‍ അത് നിർബന്ധവുമല്ല.
അവസാന തുള്ളിവരെ ഓടിച്ച്‌ ലാഭിക്കാനൊന്നുമില്ല. സമയത്ത് ഇന്ധനം നിറയ്ക്കുക. വഴിയില്‍ നില്‍ക്കാതിരിക്കാം; പമ്പിനും പണികൊടുക്കാതിരിക്കാം.
