ഇടുക്കിയില് ഒന്നര വയസ്സുകാരിക്ക് കവാസാക്കി രോഗം സ്ഥിരീകരിച്ചു : അപൂര്വ്വമെന്ന് റിപ്പോര്ട്ട്
ഇടുക്കി : കട്ടപ്പന സഹകരണ ആശുപത്രിയില് അപൂർവ രോഗമായ കവാസാക്കി രോഗം കണ്ടെത്തി . കുന്തളംപാറ സ്വദേശികളായ ദമ്പതിമാരുടെ മകള് ഒന്നര വയസ്സുകാരിക്കാണ് ഈ രോഗം കണ്ടെത്തിയത്. സഹകരണ ആശുപത്രിയിലെ പീഡിയാട്രീഷൻ ഡോ. ഡാനിയല് ഓസ്ബോണ് തോമസ് നടത്തിയ രോഗനിർണയം ശരിയായിരുന്നുവെന്ന് കോട്ടയം ഇ.എസ്.ഐ. കുട്ടികളുടെ ആശുപത്രിയിലെ മുതിർന്ന ഡോക്ടർമാരും കോട്ടയം മെഡിക്കല് കോളേജിലെ കാഡിയോളജിസ്റ്റും ശരിവെച്ചു.
ടോമി സാക്ക കവാസാക്കി എന്ന ജപ്പാൻകാരനായ ഡോക്ടർ കണ്ടുപിടിച്ച രോഗമായതിനാലാണ് ഇതിനെ കവാസാക്കി ഡിസീസ് എന്നപേരില് വൈദ്യശാസ്ത്രത്തില് അറിയപ്പെടുന്നത്. രക്തപരിശോധനയിലൂടെയോ ഏതെങ്കിലും തരത്തിലുള്ള ടെസ്റ്റുകളിലൂടെയോ ഇത് കണ്ടുപിടിക്കാൻ കഴിയില്ല. രോഗലക്ഷണങ്ങള് മനസ്സിലാക്കി മാത്രമേ രോഗം കണ്ടെത്താൻ കഴിയൂ.
കാരണങ്ങളൊന്നുമില്ലാതെ പനി വരികയാണ് ആദ്യം ചെയ്യുക. പനിക്ക് കാരണമായേക്കാവുന്ന ചുമ, ജലദോഷം, വയറിളക്കം, ഛർദില് ഇവയൊന്നും ഉണ്ടാകാതെ പനി മാത്രം വരും. ഇങ്ങനെ തുടർച്ചയായി അഞ്ചുദിവസം പനിക്കുകയും അനുബന്ധ രോഗലക്ഷണങ്ങളായി പീള കെട്ടാതെ കണ്ണ് ചുവക്കുക, കഴുത്തുവീക്കം (കുരുക്കള് ശരീരത്തില് വരിക), കൈ കാലുകളില് നീര് വെക്കുക, ചുണ്ടോ നാക്കോ ചുവക്കുക എന്നീ അഞ്ചു ലക്ഷണങ്ങളില് നാലെണ്ണം ഉണ്ടെങ്കില് കവാസാക്കി ഡിസീസ് എന്ന നിഗമനത്തില് എത്തിച്ചേരാം.
അഞ്ചു രോഗലക്ഷണങ്ങളും കണ്ടതിനാല് പനി അഞ്ചു ദിവസം നീണ്ടുനില്ക്കുന്നതുവരെ കാത്തുനില്ക്കാതെ നാലാമത്തെ ദിവസം തന്നെ ഡോക്ടർ കുട്ടിയെ കോട്ടയം ഇ.എസ്.ഐ. ആശുപത്രിയിലേക്ക് റഫർ ചെയ്തു. കവാസാക്കി ഡിസീസ് എന്ന് സൂചിപ്പിച്ച് റെഫറല് ലെറ്റർ കൂടി കൊടുത്തയച്ചാണ് കോട്ടയത്തേക്ക് വിട്ടത്.
പനി മൂർച്ഛിച്ച് ഹൃദയധമനികളുടെ പ്രവർത്തനം നിലച്ച് പൊട്ടിപ്പോകുന്നതാണ് കവാസാക്കിയുടെ അപകടാവസ്ഥ. ഇ.എസ്.ഐ. ആശുപത്രിയില് രാത്രി 11-ന് തന്നെ കുട്ടിയുമായി മാതാപിതാക്കള് എത്തി. രാത്രിയില് ജൂനിയർ ഡോക്ടർ അഡ്മിറ്റ് ചെയ്യുകയും പിന്നീട് മുതിർന്ന ഡോക്ടർമാർ പരിശോധിക്കുകയും കാവസാക്കി എന്ന നിഗമനത്തില് എത്തിയശേഷം കോട്ടയം മെഡിക്കല് കോളേജിലെ കാർഡിയോളജിസ്റ്റിന് അടിയന്തരമായി റഫർ ചെയ്യുകയും ചെയ്തു.
60,000 രൂപ വിലവരുന്ന ഇഞ്ചക്ഷൻ കുട്ടിക്ക് നല്കി. 12 മണിക്കൂർ കൊണ്ടാണ് ഐവി ഇഞ്ചക്ഷനായി മരുന്ന് പകർന്നുനല്കിയത്. സമയത്ത് ചികിത്സ കിട്ടിയതിനാല് രോഗത്തില്നിന്ന് മോചിതയായി ഒന്നര വയസ്സുകാരി വീട്ടില് തിരിച്ചെത്തി.
