കേരളത്തില്‍ നിന്നുള്ള അന്തര്‍ സംസ്ഥാന ബസുകള്‍ നാളെ മുതല്‍ പണിമുടക്കും
കേരളത്തില്‍നിന്നുള്ള അന്തർസംസ്ഥാന ബസുകള്‍ സമരത്തിലേക്ക്. ചൊവ്വാഴ്ച മുതല്‍ സർവീസ് നിർത്തിവെക്കും. കേരളത്തില്‍നിന്ന് ബെംഗളൂരൂവിലേക്കും, ചെന്നൈയിലെക്കുമടക്കം സർവീസ് നടത്തുന്ന സ്ലീപർ, സെമി സ്ലീപർ ലക്ഷ്വറി ബസുകളാണ് സർവീസ് നിർത്തിവെക്കുന്നത്.തമിഴ്‌നാട്, കർണാടക സംസ്ഥാനങ്ങളിലെ അന്യായ നികുതിയിലും പിഴയിലും പ്രതിഷേധിച്ചാണ് സമരം. ചൊവ്വാഴ്ച വൈകിട്ട് 6 മണി മുതല്‍ സർവീസ് നിർത്തിവെക്കാനാണ് തീരുമാനമെന്ന് ലക്ഷ്വറി ബസ് ഓണഴ്‌സ് അസോസിയേഷൻ അറിയിച്ചു.
അഖിലേന്ത്യ പെർമിറ്റ് ഉണ്ടായിട്ടും തമിഴ്‌നാട്ടിലും കർണാടകയിലും അന്യായമായി നികുതിയാണ് ചുമത്തുന്നതെന്നും, വാഹനം പിടിച്ചെടുത്ത് പിഴ ഈടാക്കുകയാണെന്നും ലക്ഷ്വറി ബസ് ഓണേഴ്‌സ് അസോസിയേഷൻ ആരോപിച്ചു.
