8 മണിക്കൂര് ഉറങ്ങിയാലും ക്ഷീണം മാറുന്നില്ലേ…? കാരണങ്ങള് ഇതാവാം
എട്ട് മണിക്കൂർ കൃത്യമായി ഉറങ്ങി ഉണർന്നാലും കടുത്ത ക്ഷീണം അനുഭവിച്ച് എഴുന്നേല്ക്കുന്ന അവസ്ഥ നിങ്ങള്ക്ക് ഉണ്ടായിട്ടുണ്ടോ? എങ്കില് ഇതാവാം കാരണം. പ്രധാനമായും അറിഞ്ഞിരിക്കേണ്ട കാര്യങ്ങള് ഇവയാണ്.
തുടർച്ചയായി തടസ്സമില്ലാതെ ലഭിക്കുന്ന ആഴത്തിലുള്ള ഉറക്കമാണ് ശരീരത്തിന് ഉന്മേഷം നല്കുന്നത്. രാത്രിയില് ഇടയ്ക്കിടെ ഉണരുന്നത് മൂലം തലച്ചോറിനും ശരീരത്തിനും ആവശ്യമായ ‘ഡീപ് സ്ലീപ്’ ലഭിക്കാതെ വരുന്നു.
ഉറക്കത്തില് ശ്വാസോച്ഛ്വാസം തടസ്സപ്പെടുന്ന ‘ഒബ്സ്ട്രക്റ്റീവ് സ്ലീപ് ആപ്നിയ’ എന്ന അവസ്ഥ ഉറക്കത്തെ തടസ്സപ്പെടുത്താം. കടുത്ത കുറുകല്, ഉറക്കത്തിനിടയില് ശ്വാസം മുട്ടുക, പകല് സമയത്ത് അമിതമായ ഉറക്കം തൂങ്ങല് എന്നിവ ഇതിന്റെ പ്രധാന ലക്ഷണങ്ങളാണ്.
കിടക്കയില് കിടന്നത് കൊണ്ട് മാത്രം തലച്ചോറിലെ ചിന്തകള് നിലയ്ക്കണമെന്നില്ല. വിട്ടുമാറാത്ത മാനസിക സമ്മർദ്ദവും ഉത്കണ്ഠയും ശരീരത്തെ എപ്പോഴും ജാഗരൂകമാക്കി നിർത്തുന്നു. ഇത് ഉറക്കത്തിന്റെ സ്വാഭാവിക താളത്തെ തകർക്കും.
ഉറങ്ങുന്നതിന് തൊട്ടുമുമ്പ് ഫോണ്, ടാബ്ലെറ്റ്, ലാപ്ടോപ്പ് എന്നിവ ഉപയോഗിക്കുന്നത് ഉറക്കത്തെ പ്രതികൂലമായി ബാധിക്കും. സ്ക്രീനുകളില് നിന്നുള്ള നീല വെളിച്ചം ശരീരത്തിലെ ഉറക്ക ഹോർമോണായ മെലാടോണിന്റെ ഉത്പാദനത്തെ തടസ്സപ്പെടുത്തുന്നു.
രാത്രിയില് കുടിക്കുന്ന കാപ്പിയും മദ്യവും ഉറക്കത്തിന് തടസ്സമുണ്ടാക്കുന്നു. കഫീൻ ഉറക്കം വരുന്നത് വൈകിപ്പിക്കുമ്പോള്, മദ്യം പെട്ടെന്ന് ഉറക്കം നല്കിയാലും രാത്രിയുടെ രണ്ടാം പകുതിയില് ഉറക്കത്തെ തടസ്സപ്പെടുത്തുകയും ആഴത്തിലുള്ള ഉറക്കം തടയുകയും ചെയ്യുന്നു.
ദിവസവും വ്യത്യസ്ത സമയങ്ങളില് ഉറങ്ങുക, വ്യായാമത്തിന്റെ കുറവ്, മോശം ഭക്ഷണരീതി, ഉറങ്ങാൻ അനുയോജ്യമല്ലാത്ത മുറിയിലെ അന്തരീക്ഷം എന്നിവ ഉറക്കത്തിന്റെ ഗുണനിലവാരം കുറയ്ക്കും.
