ഭാര്യയെ വെട്ടിപ്പരിക്കേൽപ്പിച്ച് മുങ്ങിയ ഭർത്താവ് പിടിയിൽ

മേപ്പാടി : ഭാര്യയെ വെട്ടിപ്പരിക്കേൽപ്പിച്ച് മുങ്ങിയ ഭർത്താവിനെ പോലീസ് പിടികൂടി. മേപ്പാടി നെടുമ്പാല പുല്ലത്ത് വീട്ടിൽ എ.പി. അഷ്റഫ് (50) ആണ് പിടിയിലായത്. തമിഴ്‌നാട് സ്വദേശികളുടെ കൂടെ വാടകയ്ക്ക് താമസിച്ചുവരുകയായിരുന്ന ഇയാളെ ബുധനാഴ്ച കോട്ടക്കലിൽനിന്നാണ് കസ്റ്റഡിയിലെടുത്തത്. മൂത്തമകളുടെ വിവാഹം അനുവാദം കൂടാതെ നടത്തിയെന്നാരോപിച്ചാണ് ഇയാൾ ഭാര്യയെ വെട്ടിപ്പരിക്കേൽപ്പിച്ചത്.

മാർച്ച് എട്ടിനായിരുന്നു സംഭവം. ഭാര്യയുടെ വീട്ടിനുള്ളിൽ അതിക്രമിച്ച് കയറി കൈകൊണ്ട് മർദിക്കുകയും ചാക്കിൽ

കരുതിയിരുന്ന കത്തികൊണ്ട് കുത്തി തോളിൽ മുറിവേൽപ്പിക്കുകയുമായിരുന്നു. തടയാൻ ശ്രമിച്ച മക്കളെ കൊല്ലുമെന്ന് ഭീഷണിപ്പെടുത്തുകയും ചെയ്തു.

മേപ്പാടി എസ്.ഐ. പി.സുനിൽകുമാറിൻ്റെ നേതൃത്വത്തിലാണ് പ്രതിയെ പിടികൂടിയത്.

എസ്.സി.പി.ഒ.മാരായ സുനിൽ, ഷമീർ, സി.പി.ഒ. വിപിൻ എന്നിവരും സംഘത്തിലുണ്ടായിരുന്നു.