കുതിപ്പ് തുടർന്ന് സ്വർണവില : ഇന്ന് ഒറ്റയടിക്ക് 560 രൂപ കൂടി : രണ്ടു ദിവസത്തിനിടെ 1040 രൂപയുടെ വർധന
സംസ്ഥാനത്ത് കുതിപ്പ് തിരിച്ചുപിടിച്ച്‌ സ്വർണവില. പവന് ഒറ്റയടിക്ക് 560 രൂപയും ഗ്രാമിന് 70 രൂപയുമാണ് വര്‍ധിച്ചത്. ഇതോടെ ഒരു പവൻ സ്വർണത്തിന് 56,520 രൂപയിലും ഗ്രാമിന് 7,065 രൂപയിലുമാണ് വ്യാപാരം പുരോഗമിക്കുന്നത്. ഒരു ഗ്രാം 18 കാരറ്റ് സ്വർണത്തിന്‍റെ വില 5,830 രൂപയാണ്.
തിങ്കളാഴ്ച പവന് 480 രൂപ വർധിച്ചിരുന്നു. ദിവസങ്ങളുടെ വ്യത്യാസത്തില്‍ ഏകദേശം 3500 രൂപ കുറഞ്ഞ ശേഷമാണ് തിങ്കളാഴ്ച മുതല്‍ സ്വർണവിലയില്‍ മുന്നേറ്റം ദൃശ്യമായത്. രണ്ടുദിവസത്തിനിടെ ആയിരത്തിലധികം രൂപയാണ് വര്‍ധിച്ചത്. കഴിഞ്ഞ ഒരാഴ്ച കേരള വിപണിയില്‍ സ്വർണത്തിന് കുറഞ്ഞത് 2,800 രൂപയാണ്.
ഈ മാസത്തിന്‍റെ തുടക്കത്തില്‍ 59,080 രൂപയായിരുന്നു സ്വര്‍ണവില. ഒരുഘട്ടത്തില്‍ സ്വര്‍ണവില 60,000 കടന്നും കുതിക്കുമെന്ന് തോന്നിപ്പിച്ചിരുന്നു. എന്നാല്‍ ഏഴിന് 57,600 രൂപയായി താഴ്ന്ന ശേഷം ഒരുതവണ തിരിച്ചുകയറിയ സ്വര്‍ണവില പിന്നീട് ഇടിയുന്നതാണ് കണ്ടത്. ഒക്ടോബർ 31ന് രേഖപ്പെടുത്തിയ 59,640 രൂപയാണ് കേരളത്തില്‍ പവൻ വിലയിലെ എക്കാലത്തെയും റിക്കാർഡ്. അന്താരാഷ്ട്ര വിപണിയിലെ ചലനങ്ങളാണ് സ്വര്‍ണവിലയില്‍ പ്രതിഫലിക്കുന്നത്.
അതേസമയം വെള്ളിയുടെ വിലയും ഉയർന്നിട്ടുണ്ട്. ഗ്രാമിന് 99 രൂപയ്ക്കാണ് വ്യാപാരം പുരോഗമിക്കുന്നത്.
