പേവിഷബാധ : മൃഗങ്ങളുടെ കടിയേറ്റാല്‍ ചെയ്യേണ്ടത്

കൽപ്പറ്റ : മൃഗങ്ങളുടെ കടിയേറ്റാല്‍ ആദ്യം ചെയ്യേണ്ടത് കടിയേറ്റ ഭാഗം 15 മിനിട്ട് സോപ്പ് ഉപയോഗിച്ച് കഴുകി വൃത്തിയാക്കണം. മുറിവിലുള്ള വൈറസ് പരമാവധി ഒഴിവാക്കാന്‍ ഇതിലൂടെ സാധിക്കും. ബീറ്റാഡിന്‍ ലോഷനോ ഓയിന്‍മെന്റോ ലഭ്യമാണെങ്കില്‍ പുരട്ടാവുന്നതാണ്. മുറിവ് കെട്ടിവയ്ക്കരുത്. ശേഷം കുത്തിവെയ്പ്പ് നിര്‍ബന്ധമായും എടുക്കണം. പേവിഷബാധയ്ക്ക് ഫലപ്രദമായ ചികിത്സ ഇല്ലാത്തതിനാല്‍ കടിയോ മാന്തലോ പോറലോ ഏറ്റാല്‍ കുത്തിവെയ്പ്പ് എടുക്കേണ്ടത് അനിവാര്യമാണ്. പേവിഷബാധയ്‌ക്കെതിരെ തൊലിപ്പുറത്ത് എടുക്കുന്ന കുത്തിവെയ്പ്പ് നല്‍കുന്നത്. 0, 3, 7 ,28 ദിവസങ്ങളിലാണ് കുത്തിവെയ്പ്പുകള്‍ എടുക്കേണ്ടത്. മുറിവിന്റെ സ്വഭാവമനുസരിച്ച് ഇമ്മ്യൂണോ ഗ്ലോബുലിന്‍ കുത്തിവെയ്പ്പ് നല്‍കാറുണ്ട്. പേവിഷബാധയ്‌ക്കെതിരെ യഥാസമയം കുത്തിവെയ്പ്പ് എടുത്താല്‍ മരണം തടയാം. ഡോക്ടര്‍ നിര്‍ദേശിക്കുന്ന ദിവസങ്ങളില്‍ തന്നെ പ്രതിരോധ കുത്തിവെയ്പ്പുകള്‍ നിര്‍ബന്ധമായും എടുക്കേണ്ടതാണ്. വളര്‍ത്ത് മൃഗങ്ങള്‍ക്ക് പ്രതിരോധ കുത്തിവെയ്പ്പ് എടുക്കുന്നത് രോഗപ്രതിരോധത്തില്‍ പ്രധാനമാണ്. വളര്‍ത്ത് മൃഗങ്ങള്‍ക്ക് ആറ് മാസം പ്രായമായാല്‍ ആദ്യ കുത്തിവെയ്പ്പ് എടുത്ത് പിന്നീട് ഓരോ വര്‍ഷ ഇടവേളയില്‍ പ്രതിരോധകുത്തിവെയ്പ്പ് നല്‍കണം.