മാനന്തവാടിയിൽ വടിവാൾ കണ്ടെടുത്ത സംഭവം ; പോലീസിൽ കീഴടങ്ങിയ പ്രതിയുടെ അറസ്റ്റ് രേഖപ്പെടുത്തി
മാനന്തവാടി : മാനന്തവാടിയിൽ വടിവാൾ കണ്ടെടുത്ത സംഭവത്തിൽ പോലീസിൽ കീഴടങ്ങിയ പ്രതിയുടെ അറസ്റ്റ് രേഖപ്പെടുത്തി. കല്ലുമൊട്ടന്‍കുന്ന് മിയ മന്‍സില്‍ സലീം (33) നെയാണ് മാനന്തവാടി പോലീസ് അറസ്റ്റ് ചെയ്തത്.
മാനന്തവാടി എസ് ആൻഡ് എസ് ടയര്‍ വര്‍ക്സ് കടയുടെ ഉടമയും പോപ്പുലര്‍ ഫ്രണ്ടിന്റെ മാനന്തവാടിയിലെ പ്രാദേശിക നേതാവുമായ ഇയാളുടെ കടയില്‍ നിന്നും സെപ്തംബര്‍ 27 ന് 4 വടിവാളുകള്‍ പിടിച്ചെടുത്തതിനെ തുടര്‍ന്ന് ആയുധ നിയമപ്രകാരം കേസെടുത്തിരുന്നു. അന്ന് മുതല്‍ ഒളിവിലായിരുന്ന സലീം ഇന്നലെ മാനന്തവാടി സ്റ്റേഷനില്‍ അന്വേഷണ ഉദ്യോഗസ്ഥര്‍ മുമ്പാകെ കീഴടങ്ങുകയായിരുന്നു. പ്രതിയുടെ അറസ്റ്റിന് ശേഷം ടയര്‍ കടയിലും, വീട്ടിലുമെത്തിച്ച് തെളിവെടുപ്പ് നടത്തി.
മാനന്തവാടി സി.ഐ അബ്ദുള്‍ കരീം, എസ്.ഐ സനല്‍, ജൂനിയര്‍ എസ്.ഐ സാബു, എ.എസ്.ഐമാരായ മെര്‍വിന്‍ ഡിക്രൂസ്, സജി എന്നിവരടങ്ങുന്ന പോലീസ് സംഘമാണ് തെളിവെടുപ്പ് നടത്തിയത്. പ്രതിയെ കോടതിയില്‍ ഹാജരാക്കിയ ശേഷം പിന്നീട് കസ്റ്റഡിയില്‍ വാങ്ങി വിശദമായ അന്വേഷണം നടത്തുമെന്ന് പോലീസ് വ്യക്തമാക്കി.
