April 3, 2025

കോമണ്‍വെല്‍ത്ത് ഗെയിംസ് ; ഇന്ത്യയ്ക്ക് വേണ്ടി അഭിമാന നേട്ടം കൊയ്ത് ഗുസ്തി താരങ്ങള്‍ : മൂന്ന് സ്വർണവും ഒരു വെങ്കലവും

Share

കോമണ്‍വെല്‍ത്ത് ഗെയിംസ് ; ഇന്ത്യയ്ക്ക് വേണ്ടി അഭിമാന നേട്ടം കൊയ്ത് ഗുസ്തി താരങ്ങള്‍ : മൂന്ന് സ്വർണവും ഒരു വെങ്കലവും

കോമണ്‍വെല്‍ത്ത് ഗെയിംസില്‍ ശനിയാഴ്ചയും ഇന്ത്യയ്ക്ക് വേണ്ടി അഭിമാന നേട്ടം കൊയ്ത് ഗുസ്തി താരങ്ങള്‍. മൂന്ന് സ്വര്‍ണം ഉള്‍പ്പെടെ നാല് മെഡലുകളാണ് ഗുസ്തി താരങ്ങള്‍ രാജ്യത്തിനായി നേടിയത്.

പുരുഷന്മാരുടെ 57 കിലോഗ്രാം ഫ്രീസ്റ്റൈല്‍ ഗുസ്തിയില്‍ രവി ദഹിയയും 74 കിലോഗ്രാം വിഭാഗത്തില്‍ നവീനും വനിതകളുടെ 63 കിലോഗ്രാമില്‍ വിനേഷ് ഫോര്‍ഗാട്ടും സ്വര്‍ണം നേടി. വനിതകളുടെ 50 കിലോ വിഭാഗത്തില്‍ പൂജ ഗെഹ് ലോട്ട് വെങ്കലം നേടി.

രവികുമാറിന്റെ ആദ്യ കോമണ്‍വെല്‍ത്ത് ഗെയിംസ് മത്സരമായിരുന്നു ഇത്. നൈജീരിയന്‍ താരം എബിക്കെവെനിമോ വെല്‍സണെ തോല്‍പ്പിച്ചായിരുന്നു സ്വര്‍ണ നേട്ടം. ഹരിയാന സ്വദേശിയായ ദഹിയ 24-കാരനാണ്. ഒളിംപിക്സിലെ വെള്ളി മെഡല്‍ ജേതാവായ ഇദ്ദേഹം ബര്‍മിങ്ഹാമില്‍ പത്ത് പോയിന്റുകള്‍ നേടിയാണ് നൈജീരിയന്‍ താരത്തെ തോല്‍പ്പിച്ചത്.

ഫൈനലില്‍ പാക്കിസ്ഥാന്റെ മുഹമ്മദ് താഹിറിനെ പരാജയപ്പെടുത്തി. താഹിറിനെ അനങ്ങാന്‍ വിടാതെയായിരുന്നു നവീന്‍ (90) സ്വര്‍ണം മലര്‍ത്തിയടിച്ചത്. ഇതോടെ ഗുസ്തിയില്‍ ഇന്ത്യയുടെ മെഡല്‍ നേട്ടം ആറായി. ഇന്ത്യയുടെ ആകെ സ്വര്‍ണനേട്ടം 12 ആയി ഉയര്‍ന്നു.

ഗുസ്തിയില്‍ സ്വര്‍ണം നേടിയ വിനേഷ് ഫോഗട്ട് റെക്കോര്‍ഡ് പ്രകടനമാണ് കാഴ്ചവെച്ചത്. ഏഷ്യന്‍ഗെയിംസിലും കോമണ്‍വെല്‍ത്തിലും സ്വര്‍ണം നേടുന്ന ആദ്യ വനിതയായി വിനേഷ് മാറി. കൂടാതെ കഴിഞ്ഞ രണ്ട് കോമണ്‍വെല്‍ത്ത് ഗെയിംസിലും ഇവര്‍ സ്വര്‍ണം നേടിയിരുന്നു. ശ്രീലങ്കയുടെ ചാമോദയ കേഷാനിയെ തോല്‍പ്പിച്ചാണ് മൂന്നാമത്തെ തവണ സ്വര്‍ണം നേടിയത്.

ടോക്കിയോ ഒളിംപിക്‌സിലെ നിരാശാജനകമായ പ്രകടനത്തിനുശേഷം ഗുസ്തി മതിയാക്കാനൊരുങ്ങിയ വിനേഷിന്റെ ശക്തമായ തിരിച്ചുവരവാണ് ബര്‍മിങ്ഹാമില്‍ കണ്ടത്. റൗണ്ട് റോബിന്‍ ലീഗ് അടിസ്ഥാനത്തില്‍ നടന്ന മത്സരത്തില്‍ മൂന്ന് എതിരാളികള്‍ക്കെതിരെയും ആധികാരിക ജയവുമായാണ് വിനേഷ് സ്വര്‍ണം സ്വന്തമാക്കിയത്. നിര്‍ണായക അവസാന മത്സരത്തില്‍ ശ്രീലങ്കയുടെ ചംബോഡ്യ കേശാനിയെ തോല്‍പ്പിച്ചാണ് വിനേശ് ബര്‍മിങ്ഹാമിലും ഗോദയില്‍ ജയിച്ചു കയറിയത്.

അതിന് മുമ്പ് കനേഡിയന്‍ താരവും ലോക ചാമ്പ്യന്‍ഷിപ്പിലെ വെങ്കല മെഡല്‍ ജേതാവുമായ സാമന്ത ലെഗ് സ്റ്റുവര്‍ട്ടിനെയും നൈജീരിയയുടെ ബൊലാഫുനോലുവ അഡേക്യുറോയെയും വിനേഷ് മലര്‍ത്തിയടിച്ചിരുന്നു. തൂടര്‍ച്ചയായ മൂന്നാം സ്വര്‍ണനേട്ടത്തോടെ ഈ നേട്ടം കൈവരിക്കുന്ന ആദ്യ ഇന്ത്യന്‍ താരമായി വിനേഷ്. രണ്ട് സ്വര്‍ണം നേടിയിട്ടുള്ള ഗുസ്തി താരം സുശീല്‍ കുമാറിനെയാണ് വിനേഷ് മറികടന്നത്.

പുരുഷന്മാരുടെ 57 കിലോ വിഭാഗത്തിലെ ഏകപക്ഷീയമായ ഫൈനലില്‍ നൈജീരിയയുടെ എബിക്കെവെനിമോ വെല്‍സണെ മലര്‍ത്തി അടിച്ചാണ് (100) രവി കുമാര്‍ സ്വര്‍ണം കഴുത്തലണിഞ്ഞത്. ടോക്കിയോ ഒളിംപിക്‌സില്‍ 57 കിലോ ഫ്രീ സ്‌റ്റൈല്‍ വിഭാഗത്തില്‍ രവി കുമാര്‍ വെള്ളി നേടിയിരുന്നു. മൂന്ന് തവണ കോമണ്‍വെല്‍ത്ത് ഗെയിംസില്‍ മെഡല്‍ നേടിയിട്ടുള്ള വെല്‍സണ്‍ തുടക്കം മുതല്‍ ആക്രമിക്കാന്‍ ശ്രമിച്ചെങ്കിലും രവി കുമാര്‍ പ്രതിരോധിച്ചു.

മത്സരം തുടങ്ങി ഒരു മിനിറ്റിനകം നൈജീരിയന്‍ താരത്തെ കാലില്‍ പിടിച്ച്‌ മലര്‍ത്തയടിച്ച രവികുമാര്‍ 8 പോയന്റ് സ്വന്തമാക്കി. പെട്ടെന്നുള്ള തോല്‍വി ഒഴിവാക്കാന്‍ നൈജീരിയന്‍ താരം റിംഗിന് പുറത്തേക്ക് കടക്കാന്‍ ശ്രമിച്ചെങ്കിലും കാല്‍ക്കുഴയില്‍ പിടുത്തമിട്ട രവി കുമാര്‍ അനായാസം പോയന്റുകള്‍ നേടി വിജയം ഉറപ്പിച്ചു.

നേരത്തെ വനിതകളുടെ 50 കിലോ ഫ്രീ സ്‌റ്റൈല്‍ ഗുസ്തിയില്‍ പൂജ ഗെഹ്ലോട്ടിന് വെങ്കലം കൊണ്ട് തൃപ്തിപ്പെടേണ്ടിവന്നു. വെങ്കല മെഡല്‍ പോരാട്ടത്തില്‍ സ്‌കോട്ടിഷ് താരത്തിനെതിരെ തുടക്കത്തില്‍ പിന്നിലായെങ്കിലും പിന്നീട് തിരിച്ചടിച്ച പൂജ മെഡല്‍ ഉറപ്പാക്കി.

ഇതോടെ ഗുസ്തിയില്‍ ഇന്ത്യ നേടിയ സ്വര്‍ണ മെഡലുകളുടെ എണ്ണം ആറായി. നേരത്തെ സാക്ഷി മാലിക്, ബജ്‌റംഗ് പൂനിയ, ദീപക് പൂനിയ എന്നിവരായിരുന്നു സ്വര്‍ണം നേടിയത്.

10 കിലോമീറ്റര്‍ റേസ് വോക്കില്‍ പ്രിയങ്ക ഗോസ്വാമിയും പുരുഷന്മാരുടെ 3000 മീറ്റര്‍ സ്റ്റീപ്പിള്‍ചേസില്‍ അവിനാഷ് സാബിളും വെള്ളി മെഡല്‍ സ്വന്തമാക്കി. ദേശീയ റെക്കോര്‍ഡോഡെയാണ് അവിനാഷിന്റെ നേട്ടം. ബോക്‌സിങ്ങില്‍ അമിത് പംഗല്‍ (പുരുഷന്മാരുടെ ഫ്‌ളൈവെയ്റ്റ്), നിതു ഗംഗസ് (വനിതാ വിഭാഗം) എന്നിവര്‍ ഫൈനലില്‍ പ്രവേശിച്ചു. നിഖാത് സരീന്‍ ഉള്‍പ്പെടെ മറ്റു നാല് ഇന്ത്യന്‍ താരങ്ങള്‍ സെമിയില്‍ പ്രവേശിച്ചു.

ബാഡ്മിന്റന്‍ സിംഗിള്‍സില്‍ പി.വി സിന്ധു സെമി ഫൈനലില്‍ കടന്നു. ഞായറാഴ്ചയാണ് സെമി ഫൈനല്‍ മത്സരം. കിഡംബി ശ്രീകാന്ത്, ലക്ഷ്യ സെന്‍ എന്നിവരും സിംഗിള്‍സ് ക്വാര്‍ട്ടര്‍ ഫൈനലില്‍ കളത്തിലിറങ്ങുന്നുണ്ട്. ടേബിള്‍ ടെന്നിസില്‍ അചന്ത ശരത് കമല്‍, മണിക ബത്ര എന്നിവരും കളത്തിലിറങ്ങും.

ഗുസ്തി പിടിച്ച്‌ നേടിയ സ്വര്‍ണങ്ങളിലൂടെ കോമണ്‍വെല്‍ത്ത് ഗെയിംസ് മെഡല്‍ പട്ടികയില്‍ ഇന്ത്യ 12 സ്വര്‍ണവുമായി അഞ്ചാം സ്ഥാനത്തേക്ക് ഉയര്‍ന്നു. 12 സ്വര്‍ണവും 11 വെള്ളിയും 11 വെങ്കലവുമായി അഞ്ചാം സ്ഥാനത്താണ് ഇന്ത്യ. 57 സ്വര്‍ണവും 46 വെള്ളിയും 47 വെങ്കലവും അടക്കം 150 മെഡലുകളുമായി ഓസ്‌ട്രേലിയ ആണ് ഒന്നാമത്. 48 സ്വര്‍ണം അടക്കം 137 മെഡലുകളുള്ള ഇംഗ്ലണ്ട് രണ്ടാമതും 20 സ്വര്‍ണം ഉള്‍പ്പെടെ 79 മെഡലുകളുള്ള കാനഡ മൂന്നാമതും 17 സ്വര്‍ണം ഉള്‍പ്പെടെ 42 മെഡലുകളുള്ള ന്യൂസിലന്‍ഡ് നാലാമതുമാണ്.

 

 


Share

Leave a Reply

Your email address will not be published. Required fields are marked *

Copyright © All rights reserved. | Newsphere by AF themes.