കോമണ്‍വെല്‍ത്ത് ഗെയിംസില്‍ ഇന്ത്യയ്ക്ക് മൂന്നാം സ്വര്‍ണം ; റെക്കോർഡോടെ കിരീടമുയർത്തി അചിന്ത ഷിവലി
കോമണ്‍വെല്‍ത്ത് ഗെയിംസില്‍ ഇന്ത്യയ്ക്ക് മൂന്നാം സ്വര്‍ണം. 73 കിലോഗ്രാം പുരുഷന്മാരുടെ ഭാരോദ്വഹനത്തില്‍ അചിന്ത ഷിവലിയാണ് നേട്ടം കെെവരിച്ചകത്. ഇതോടെ കോമണ്‍വെല്‍ത്ത് ഗെയിംസില്‍ ഇന്ത്യയുടെ മെഡല്‍ നേട്ടം ആറായി.
ഫൈനലില്‍ മലേഷ്യയുടെ എറി ഹിഥായത്ത് മുഹമ്മദിനെ പിന്തള്ളിയാണ് 20-കാരനായ അചിന്ത സ്വര്‍ണ്ണം നേടിയത്. തനിക്ക് ലഭിച്ച നേട്ടം സഹോദരനും പരിശീലകനും സമര്‍പ്പിക്കുന്നതായി അചിന്ത പ്രതികരിച്ചു. ആകെ 313 കിലോ ഉയര്‍ത്തി അചിന്ത കോമണ്‍വെല്‍ത്ത് ഗെയിംസ്‌ റെക്കോര്‍ഡ് സ്ഥാപിക്കുകയും ചെയ്തു. പുരുഷന്മാരുടെ 67 കിലോഗ്രാം വിഭാഗത്തില്‍ മിസോറംകാരനായ ജെറമി ലാല്‍റിന്നുംഗ റെക്കോഡ് തിളക്കത്തില്‍ സ്വര്‍ണം നേടിയതിന് പിന്നാലെയാണിത്. മത്സരത്തില്‍ കാനഡയുടെ ഷാഡ് ദാര്‍സിഗ്നി മൂന്നാം സ്ഥാനം നേടി.
ഭാരോദ്വഹനത്തില്‍ നിന്നാണ് ഇന്ത്യയ്ക്ക് ഗെയിംസില്‍ ഇതുവരെ ലഭിച്ച ആറ് മെഡലുകളും സ്വന്തമായത്. വനിതകളുടെ 55 കിലോഗ്രാം വിഭാഗത്തില്‍ മണിപ്പൂരുകാരിയായ ബിന്ധ്യാറാണി ദേവി ഞായറാഴ്ച പുലര്‍ച്ചെ വെങ്കലം സ്വന്തമാക്കി. ശനിയാഴ്ച മീരാഭായ് ചാനു സ്വര്‍ണവും സങ്കേത് സര്‍ഗാര്‍ വെള്ളിയും ഗുരുരാജ പൂജാരി വെങ്കലവും നേടിയിരുന്നു.
ജെറമി ലാല്‍റിന്നുംഗ സ്വര്‍ണം നേടി മണിക്കൂറുകള്‍ക്ക് ശേഷമാണ് അചിന്തയുടെ വിജയം. മത്സരത്തിനിടെ ജെറമിക്ക് കൈമുട്ടിന് പരിക്കേറ്റിരുന്നു.
അതേസമയം ബംഗ്ലാദേശിനെ 3-0ന് തോല്‍പ്പിച്ച്‌ ഇന്ത്യയുടെ പുരുഷ ടേബിള്‍ ടെന്നീസ് ടീം സെമിയില്‍ പ്രവേശിച്ചപ്പോള്‍ വനിതാ ക്രിക്കറ്റ് ടീം പാകിസ്ഥാനെ എട്ട് വിക്കറ്റിന് തകര്‍ത്തു. പുരുഷ ഹോക്കിയില്‍ ഇന്ത്യ ഘാനയെ അനായാസം തോല്‍പ്പിച്ചു. 11-0നായിരുന്നു ഇന്ത്യയുടെ ജയം. മിക്സഡ് ബാഡ്മിന്റണ്‍ ക്വാര്‍ട്ടര്‍ ഫൈനലിലും ഇന്ത്യ സൗത്ത് ആഫ്രിക്കയെ പരാജയപ്പെടുത്തി.
