കേരളം ചുട്ടുപൊള്ളുന്നു ; 10 ജില്ലകളില് താപനില ഉയരും, ജാഗ്രതാനിര്ദ്ദേശം!
തിരുവനന്തപുരം : വേനല് കടുക്കുന്നതോടെ സംസ്ഥാനത്ത് ഉയർന്ന താപനില തുടരുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.ഏപ്രില് 14 വരെ സംസ്ഥാനത്തെ പത്ത് ജില്ലകളില് സാധാരണയേക്കാള് മൂന്ന് ഡിഗ്രി സെല്ഷ്യസ് വരെ ചൂട് കൂടാൻ സാധ്യതയുണ്ടെന്നാണ് റിപ്പോർട്ടുകള് സൂചിപ്പിക്കുന്നത്. ഉയർന്ന താപനിലയും വായുവിലെ ഈർപ്പവും കൂടുതല് ദുസ്സഹമാക്കുന്ന അസ്വസ്ഥതയുള്ള കാലാവസ്ഥ വരും ദിവസങ്ങളില് അനുഭവപ്പെടും.
കൊല്ലം, പാലക്കാട്, കോഴിക്കോട്, കാസർകോട് ജില്ലകളില് താപനില 38 ഡിഗ്രി വരെ ഉയർന്നേക്കാം. ആലപ്പുഴ, കോട്ടയം, എറണാകുളം, തൃശൂർ, കണ്ണൂർ ജില്ലകളില് 37 ഡിഗ്രി വരെയും ചൂട് രേഖപ്പെടുത്താൻ സാധ്യതയുണ്ട്. പത്തനംതിട്ട ജില്ലയിലും ചൂട് സാധാരണ നിലയേക്കാള് കൂടുതലായിരിക്കും. മലയോര മേഖലകളില് ഒഴികെ എല്ലായിടത്തും കടുത്ത ചൂടും വിയർപ്പും കാരണം ശാരീരിക അസ്വസ്ഥതകള് ഉണ്ടാകാൻ സാധ്യതയുണ്ട്.
രാവിലെ 10 മണി മുതല് ഉച്ചയ്ക്ക് 3 മണി വരെ അന്തരീക്ഷത്തില് അള്ട്രാവയലറ്റ് സൂചിക വളരെ ഉയർന്ന നിലയിലായിരിക്കും. അമിതമായ സൂര്യപ്രകാശം നേരിട്ട് ഏല്ക്കുന്നത് സൂര്യാതപത്തിനും ചർമ്മം കരിഞ്ഞുപോകുന്നതിനും കാരണമാകും. ത്വക്ക് രോഗങ്ങള്, നേത്രരോഗങ്ങള് എന്നിവയ്ക്ക് പുറമെ രോഗപ്രതിരോധ ശേഷി കുറഞ്ഞവർക്കും ക്യാൻസർ രോഗികള്ക്കും ഇത് ഗുരുതരമായ പ്രത്യാഘാതങ്ങള് ഉണ്ടാക്കാം.
വെയില് ഏറ്റവും കടുപ്പമേറിയ 10 AM മുതല് 3 PM വരെയുള്ള സമയങ്ങളില് പുറംജോലികള് ഒഴിവാക്കുകയോ ക്രമീകരിക്കുകയോ ചെയ്യുക.
കട്ടി കുറഞ്ഞതും ഇളം നിറത്തിലുള്ളതുമായ കോട്ടണ് വസ്ത്രങ്ങള് ധരിക്കുക. പുറത്തിറങ്ങുന്നവർ കുട, വട്ടത്തൊപ്പി, സണ്ഗ്ലാസ് എന്നിവ നിർബന്ധമായും കരുതുക. കൈകാലുകള് മറയുന്ന വസ്ത്രങ്ങള് ധരിക്കുന്നത് ചർമ്മത്തെ സംരക്ഷിക്കും. ശരീരത്തിലെ ജലാംശം നിലനിർത്താൻ പഴവർഗ്ഗങ്ങളും ജ്യൂസുകളും ശീലമാക്കുക. യാത്രയിലാണെങ്കില് ഇടയ്ക്കിടെ തണലുകളില് വിശ്രമിക്കാൻ ശ്രദ്ധിക്കുക. മത്സ്യത്തൊഴിലാളികള്, ബൈക്ക് യാത്രക്കാർ, വിനോദസഞ്ചാരികള് എന്നിവർ പ്രത്യേക ജാഗ്രത പാലിക്കണമെന്നും കാലാവസ്ഥാ കേന്ദ്രം നിർദ്ദേശിക്കുന്നു.
