77-ാം റിപ്പബ്ലിക് ദിനാഘോഷ നിറവില് രാജ്യം ; കനത്ത സുരക്ഷ
എല്ലാ വർഷവും ജനുവരി 26 ന് രാജ്യം റിപ്പബ്ലിക് ദിനം ആഘോഷിക്കുന്നു. ഈ വർഷം ഇന്ത്യയുടെ 77-ാം റിപ്പബ്ലിക് ദിനമാണ്. എല്ലാ ഇന്ത്യക്കാരും ഏറെ അഭിമാനത്തോടും ആദരവോടും കൂടെയാണ് ഈ ദിവസം ആഘോഷിക്കുന്നത്. എല്ലാ വർഷവും ഓരോ തീമിന്റെ അടിസ്ഥാനത്തിലാണ് റിപ്പബ്ലിക് ദിനം ആഘോഷിക്കുന്നത്. റിപ്പബ്ലിക് ദിനം ഓരോ ഇന്ത്യക്കാരനും നമ്മുടെ സ്വത്രന്തര സമര നേതാക്കളോട് നിശബ്ദമായി നന്ദി പറയുന്ന ഒരു ദിവസം കൂടെയാണ്. കൂടാതെ രാജ്യം ഈ ദിവസം വിപുലമായ ആഘോഷ പരിപാടികൾ സഘടിപ്പിക്കാറുണ്ട്. ഈ വർഷത്തെ റിപ്പബ്ലിക് ദിന പരിപാടികൾ നടന്നത് ഡൽഹിയിലെ കാർത്തവ്യ പഥിൽവെച്ചാണ്. നാഷണൽ വാർ മെമ്മോറിയലിൽ ഇന്ത്യൻ പ്രധാനമന്ത്രി നരേന്ദ്ര മോദി പുഷ്പചക്രം അർപ്പിച്ചതോടെയാണ് റിപ്പബ്ലിക് ദിന ആഘോഷങ്ങൾക്ക് തുടക്കമായത്. തുടർന്ന് ഡൽഹി കർത്തവ്യ പഥിൽ പരേഡ് നടന്നു.
1950 ജനുവരി 26ന് ഇന്ത്യൻ ഭരണഘടന ഔദ്യോഗികമായി അംഗീകരിച്ചതിന്റെ ഓർമ്മയായിട്ടാണ് എല്ലാ വർഷവും രാജ്യം ജനുവരി 26 ന് റിപ്പബ്ലിക് ദിനം ആഘോഷിക്കുന്നത്. ഭരണഘടന നിലവിൽ വന്നതിന് ശേഷം, ഇന്ത്യ ഔദ്യോഗികമായി ഒരു പരമാധികാര ജനാധിപത്യ റിപ്പബ്ലിക്കായി മാറി. തുടർന്ന് 1935-ലെ ഗവൺമെന്റ് ഓഫ് ഇന്ത്യ ആക്ട് പോലുള്ള ബ്രിട്ടീഷ് കാലഘട്ടത്തിലെ നിയമങ്ങളിൽ നിന്ന് രാജ്യം പിന്മാറുകയും ചെയ്തു.
200 വർഷം നീണ്ട ബ്രിട്ടീഷ് ഭരണത്തിൽ നിന്നും ഇന്ത്യ സ്വാതന്ത്ര്യം നേടിയത് 1947 ആഗസ്റ്റ് 15 നാണ്. എന്നാൽ അന്ന് രാജ്യത്തിനു കൃത്യമായ ഒരു ഭരണഘടന ചട്ടക്കൂട് ഇല്ലായിരുന്നു. അതുകൊണ്ട് തന്നെ ബ്രിട്ടീഷ് കാലഘട്ടത്തിലെ 1935-ലെ ഗവൺമെന്റ് ഓഫ് ഇന്ത്യ നിയമപ്രകാരം ബ്രിട്ടീഷ് ഡൊമിനിയനായി തന്നെ ഇന്ത്യ തുടർന്നു. ശേഷം ഇന്ത്യക്ക് സ്വന്തമായി ഒരു ഭരണഘടന രൂപീകരിക്കണം എന്ന തീരുമാനമെടുക്കുകയും ഭരണഘടന രൂപീകരണ പ്രക്രിയ നിലവിൽ വരുകയും ചെയ്തു.
രണ്ട് വർഷത്തിൽ അധികം നീണ്ടുനിന്ന പ്രയത്നത്തിന് ഒടുവിൽ 1949 നവംബർ 26 ന് ഭരണഘടനക്ക് അംഗീകാരം ലഭിച്ചു. എന്നാൽ രണ്ടു മാസത്തിന് ശേഷം 1950 ജനുവരി 26 ന് ഇത് ഔദ്യോഗികമായി നിലവിൽ വന്നു. അങ്ങനെ ജനുവരി 26 നു ഇന്ത്യ റിപ്പബ്ലിക് ദിനമായി ആഘോഷിച്ച് വരുന്നു.
ഇന്ത്യക്ക് സ്വാതന്ത്ര്യം നേടി തന്നെ സ്വാതന്ത്ര്യ സമര സേനാനികൾക്കും, ഇന്ത്യയുടെ സ്വാതന്ത്ര്യത്തിനായി പോരാടിയ എല്ലാവർക്കും ആദരാഞ്ജലി അർപ്പിക്കാനുള്ള സമയമാണ് റിപ്പബ്ലിക് ദിനം. വെയിലും മഴയും, തണുപ്പും, രാത്രിയും പകലും ഒരുപോലെ സ്വന്ത ജീവൻ പണയം വെച്ച് നമ്മെ സംരക്ഷിക്കുന്ന ഇന്ത്യയുടെ ധീര ജവാന്മാരെ ഓർക്കാനും, രാജ്യത്തിന് വേണ്ടി ജീവൻ നലകിയ ജവാന്മാർക്ക് ആദരാഞ്ജലി അർപ്പിക്കാനും ഉള്ള സമയം കൂടെയാണ് റിപ്പബ്ലിക് ദിനം.
