കൽപ്പറ്റയിൽ മാരക മയക്കുമരുന്നായ എം.ഡി.എം.എയുമായി യുവാവ് പിടിയിൽ

കൽപ്പറ്റ : കൽപ്പറ്റ എക്സൈസ് സർക്കിൾ, റെയിഞ്ച്, ജില്ലാ പോലീസിൻ്റെ ലഹരി വിരുദ്ധ സ്ക്വാഡ്, കെ 9 ഡോഗ് സ്ക്വാഡ് ഉദ്യോഗസ്ഥർ സംയുക്തമായി കൽപ്പറ്റയിൽ നടത്തിയ വാഹന പരിശോധനയിൽ ബസ് യാത്രികനിൽ നിന്നും 172.37 ഗ്രാം എംഡിഎംഎ പിടിച്ചെടുത്തു.

ബംഗളൂരു- തിരൂർ സ്വകാര്യ ബസിലെ യാത്രക്കാരനായ മലപ്പുറം വെള്ളവങ്ങാട് വളനി സ്വദേശി മാഞ്ചേരി വീട്ടിൽ ഷംനാസ് എം (33) എന്നയാളിൽ നിന്നാണ് ഇന്ന് പുലർച്ചെ മയക്കുമരുന്ന് പിടികൂടിയത്. ഇയാൾ എംഡിഎംഎ ബാംഗ്ലൂരിൽ നിന്നും വാങ്ങി ശരീരത്തിൽ ഒളിപ്പിച്ച് മഞ്ചേരിയിലേക്ക് വിൽപ്പനക്കായി കൊണ്ടു പോവുകയായിരുന്നു. 20 വർഷം വരെ കഠിന തടവ് ശിക്ഷ ലഭിച്ചേക്കാവുന്ന കുറ്റമാണിത്.

എക്സൈസ് സർക്കിൾ ഇൻസ്പെക്ടർ റ്റി ഷർഫുദ്ദീൻ, പോലീസ് സബ് ഇൻസ്പെക്ടർ എൻ.വി ഹരീഷ്‌കുമാർ തുടങ്ങിയവരുടെ നേതൃത്വത്തിലായിരുന്നു പരിശോധന.