മാനന്തവാടിയിൽ ഡിസംബർ 26 മുതൽ ഗതാഗത നിയന്ത്രണം
മാനന്തവാടി ടൗണിലെ മലയോര ഹൈവേ റോഡ് വികസനവുമായി ബന്ധപ്പെട്ട് ലിറ്റിൽ ഫ്ലവർ സ്കൂൾ ജങ്ഷനിൽ ഇൻ്റർലോക്ക് പാകുന്നതിനായി ഡിസംബർ 26 മുതൽ ഗതാഗതനിയന്ത്രണം ഏർപ്പെടുത്തി. 2025 ജനുവരി നാലുവരെയാണ് നിയന്ത്രണം. കോഴിക്കോട് റോഡിലെ ബസ് ബേയുടെ പ്രവൃത്തി ഈ കാലയളവിൽ പൂർത്തീകരിക്കാനും തീരുമാനിച്ചു.
നിയന്ത്രണം ഇങ്ങനെ:
കോഴിക്കോട് നാലാംമൈൽ ഭാഗത്തുനിന്നുവരുന്ന വാഹനങ്ങൾ ഗാന്ധിപാർക്കിൽ ആളെ ഇറക്കി പോസ്റ്റോഫീസ്-താഴെയങ്ങാടി വഴി തിരിച്ചുപോകണം.
കല്ലോടി ഭാഗത്തുനിന്നുവരുന്ന വാഹനങ്ങൾ ഗാന്ധിപാർക്കിൽ ആളെ ഇറക്കി പോസ്റ്റോഫീസ്-താഴെയങ്ങാടി വഴി തിരിച്ചുപോകണം.
മൈസൂർ റോഡ്, തലശ്ശേരി റോഡ്, വള്ളിയൂർക്കാവ് എന്നിവിടങ്ങളിൽനിന്നുവരുന്ന വാഹനങ്ങൾ ഗാന്ധി പാർക്ക്-താഴെയങ്ങാടി വഴി ബസ്സ്റ്റാൻഡിൽ പോവുകയും അതേ റൂട്ടിൽതന്നെ തിരികെ പോകേണ്ടതുമാണ്.
മാനന്തവാടി ടൗണിൽ പ്രവേശിക്കേണ്ടതില്ലാത്ത വാഹനങ്ങൾ, തലശ്ശേരി ഭാഗത്തുനിന്നുവരുന്ന വാഹനങ്ങൾ എരുമത്തെരുവ്-ചെറ്റപ്പാലം ബൈപ്പാസ് വഴി വള്ളിയൂർക്കാവ് റോഡിൽ പ്രവേശിച്ചു പനമരം ഭാഗത്തേക്ക് പോകണം.
കൊയിലേരി ഭാഗത്തുനിന്നു വരുന്ന വാഹനങ്ങൾ വള്ളിയൂർക്കാവ്-ചെറ്റപ്പാലം ബൈപ്പാസിലൂടെ തലശ്ശേരി റോഡിൽ പ്രവേശിച്ച് പോകണം.
മാനന്തവാടി ടൗണിലെ തലശ്ശേരി റോഡിലെ ഓട്ടോ സ്റ്റാൻഡ്, ഗാന്ധിപാർക്കിലെ ഓട്ടോസ്റ്റാൻഡ്, താഴെയങ്ങാടി ഓട്ടോസ്റ്റാൻഡ് എന്നിവ നിർമാണം തീരുന്നതുവരെ മറ്റു സ്റ്റാൻഡുകളിൽ സർവീസ് നടത്തേണ്ടതാണ്.
